Khliehriat Jylliew 18: Ka MLA jong ka Sutnga-Saipung Constituency, ka kong Santa Mary Shylla hynnin ka sngi ka 17 tarik jylliew ka la plie paidbah ïa kawei ka jingkieng ïaid kjat kaba don ha ka wah Amsngad ha shnong Ratacherra East Jaiñtia Hills District, kane ka jingkieng ka pyniasoh ruh bad kiwei kiwei ki shnong kiba don ha ki thaiñ khappud bad kane ka jingkieng kan iarap khamtam ïa ki nongshong shnong jong ka shnong Saitual.
Ïa katei ka jingkieng ïaid kjat ha wah Amsngad la bei tyngka da ka sorkar jylla lyngba ka Inter-State Border Areas Development Programme (ISBADP) 2023-24,
Haba kren ha ka jingïalang ka kong Santa Mary Shylla ka la pynsngew ïa ka jingdon ka jingïatreilang ki paidbah nongshongshnong jong ka thaiñ lem bad ka ophis jong u Border Areas Development Officer (BADO), Khliehriat kaba la long kaba seisoh ha kaba ïadei bad kane ka jinglah ban pyntrei ïa kane ka jingkieng ïaid kjat ha Ratacherra ka ban iarap shikatdei eh ïa ki paidbah ha ka leit ka wan, ka la ong ruh ba kane ka jingkieng kan iarap ïa ki paidbah nongshong shnong jong ka shnong Saitual ba kin kham jan ban leit sha Ratacherrra, sha Umkiang bad sha kiwei kiwei ki shnong ba mar jan.
U Waheh Shnong jong ka shnong Ratacherra, u bah Pynkhlaiñ Dhar u la ong bad pynsngew ba ha ki por ba la leit ki paidbah jong ka shnong Saitual ki ïa kynduh jingeh bha ha kaba ki hap ban jam na shiliang sha shiliang ka wah Amsngad ban poi sha Ratacherra hynrei da ka jingdon kane ka jingkieng ka la iarap shibun ïa ki ha ka leit ka wan khamtam ha ka kit ka bah khamtam kaba kit ïa ki mar rep ban pynpoi sha Ratacherra, sha Umkiang.
