SHILLONG, Jylliew 18: Ka Laitumkhrah SC ka la sdang ïa ka jingïakhun jong ki ha ka Shillong Sports Association’s U-20 Fourth Division 2025 da ka jingkyrmen ha kaba ka la pynliem ïa ka New Challenger FC da 4 – 1 kol ban khur pura ïa ki lai point na ka Group-E, hynne ka sngi Balang ha madan First Ground- SSA Stadium, Polo.
Shuwa kane, ki ar tylli kiwei pat ki jingïalehkai hynne ka sngi Balang (18 tarik Jylliew, 2025) ki la kut ha ka jingïakhaid, ha kaba baroh saw tylli ki kynhun jong ka Group-D ki la khur mar 1 point. Kaba nyngkong ka Umsohsun SC ka la ïakhaid mar 1-1 kol bad ka Mawpdang SC, nangta ka Pommura SC (1 – 1) bad ka Laitlulong SC.
Ka Laitumkhrah SC ka la ïoh ban lamkhmat ïa ka jingïalehkai tang hadien 13 minit ha ka kylla step lyngba u Hamlet Thabah. Ka la pynskhem ïa ka jingjop da kaba thep sa lai kol ha ka kylla miet na u Mebankhraw Nongrum (43’min), Hamebanshanlang kharbangar (57’min) bad u Me V Ba AI sumer (80+4’min). Ka shi kol na ka New Challenger la thep da u Samborlang Jyrwa (70’min).
Haba phai sha ka jingïalehkai kaba nyngkong jong kane ka sngi la sakhi ïa ka Mawpdang kaba la lamkhmat ha ka khyllipmat shuwa ban kut ka kylla step lyngba u Sparkle Swer (40+2’min), hynrei u Balajied khonglam u la pynïakhaid na ka bynta ka Umsohsun ha ka 67 minit.
Kumjuh ha ka jingïalehkai kaba ar, ka Pommura ka la pynkhihjar nyngkong lyngba u Kitbok Thabah (18’min) hynrei ka Laitlulong ka la pynïakhaid lyngba u Bankerlang K Dewsaw ha ka minit kaba 24.
Ka prokram ïalehkai ha kane ka sngi Palei kan sdang ha ka por 10 shiteng mynstep, ha kaba ka Lawei SC kan aireng pyrshah ïa ka Mawlynrei SC. Ka jingïalehkai kaba ar ha ka por 1 baje shiteng hapdeng ka Lympyngngad SC pyrshah ïa ka Riatsamthiah SC, nangta ka jingïalehkai kaba khatduh kan long hapdeng ka Krang SC pyrshah ïa ka Mawñianglah SC.
