Shillong, Jylliew 17: U Myntri Rangbah ka Jylla Meghalaya Conrad K Sangma u la plie paidbah ïa ki 125 tylli ki Community Centre ha kylleng ka Garo Hills, kiba la bei pisa na ka Meghalaya Livelihood and Forest Ecosystem Management Project (MegLIFE).
Ha kane ka prokram la wan ban ïashim bynta da u Lamphang Ïingdorbar thaw aiñ u Thomas K Sangma, ki Myntri Sorkar kynthup u Marcuise Marak, u Rakkam A Sangma, u AT Mondal bad katto katne ngut ki MLA.
La ong ba ïa ki Community Centre la plie lyngba ki kor digital na Dobakol Awemong, kaba hab hapoh ka Baghmara C&RD block, South Garo Hills, ha kaba u Myntri Rangbah ka jylla u la don lang ban sakhi ïa kane ka jingplie paidbah kaba la long ha ka sngi baar.
Ïa ki Community Centre la shna ha ka jinglut kaba T.24 lak ha ka T.13 lak na ka projek bad T.11 lak na ka Jylla da ka jingthmu ban ai ka rynsan ïa ki paidbah ba kin leh ïa ki kam bapher bapher, kynthup ïa ki jingthmu kiba lah ban pynmih pisa.
Ka projek MegLIFE kadei kaba la bei pisa da ka Japan International Cooperation Agency (JICA) da ka jingthmu ban pynneh pynsah ïa ki khlaw ki btap bad ban kyntiew ïa ka rukom im ha ki 500 tylli ki shnong ha kylleng ki 12 tylli ki district jong ka jylla Meghalaya.
La ong ba kane ka projek kam shym la shna tang ïa ki Community Centre na ka bynta ki paidbah hynrei ka la sdang ruh ïa ki katto katne ki kam kiba lah ban pynïoh kamai, kynthup ïa ka jaka pynmih symbai, ka jingthung jingtep, ki irrigation check dam kiba rit, ki pung, ki tank plastic, bad ki tank buh um da ka dewbilat.
Ha kaba ïadei bad kane haba kren ha kane ka sngi, u Myntri Rangbah ka Jlla u la ong ba kane ka projek ka phaikhmat eh ban pynim biang ïa ki khlaw ki btap kiba la jot rathai, ban pynkhlaiñ ïa ka jingpynïaid ïa ki marpoh khyndew, bad ban kyntiew ïa ka jingim ha ki thaiñ nongkyndong.
U Conrad u la pyntip ba kane ka projek ka ai bor ïa ki paidbah ban shim ïa ka jinglong trai ïa ki khlaw ki btap, ki jaka, bad ki tyllong um.
“Ngi kwah ban tei ïa ka imlang sahlang kaba sdang ïa ka jingïarap na ka bynta ka jingim kaba neh junom. Lyngba ka projek MegLife, ngi thaw ïa ka jingsngewthuh ïa ka mariang bad pynthikna ïa ka ïoh ka kot kaba neh lyngba ki kam bapher bapher,” bynrap u Conrad.
La ong ba kane ka projek, ka thong ka long ban don 452 tylli ki community centre ha kylleng ka jylla Meghalaya.
Da kaba ai khublei ïa ka JICA kaba la ai ka jingkyrshan, u Myntri Rangbah u la pyntip ba yn sa pyndep sa 150 tam ki community centre ha Garo Hills.
Shuh shuh halor ka jingdonkam jong ki Community Centre ban kyntiew ïa ka roi ka par ha ki thaiñ kyndong, u Myntri Rangbah u la ong ba kane ka Project kan kyntiew ïa ka roi ka par jong ka imlang sahlang bad ban kyntiew ïa ki lad kamai jakpoh haba ïathuh ba ka jingthmu jong ka projek ka long eh ban pynkupbor ïa ki paidbah bad ka jingroi jingpar kaba neh pateng la pateng.
Ha kane ka sngi u Myntri Rangbah ula ïakren ruh bad ki paidbah kiba la wan sha kane ka prokram da kaba pyndonkam da ka kor digital.
