Nongpoh, Jylliew, 17: Kum ka jingïaid lynti ban jam sha uwei pat u mawjam jong ka jingshakri ha ka jingim ba kynja mynsiem bad ha ka kam ka jong u Blei, ka Narleiñ Nongbah Pastorate mynta ka sngi ka la buh ïa u maw nongrim na ka bynta ban tei ïa ka ophis treikam ba pura ban dang pynïar ïa ka jingshakri na ka bynta ki kam ka jong u Blei.
Ïa une u mawnongrim ban tei ïa ka ophis ka Narleiñ Nongbah Pastorate ba hap ha ka Ri Bhoi Presbyterian Synod la plie da u Rev. M.B Makri, Pastor Incharge ka Narleiñ Nongbah Pastorate ha ka shnong Mawlingai bad u MLA ka Mawhati u Bah Charles Marngar u la shim bynta kum u kongsan, ha ryngkat ka jingsakhi ki nongïalam ka Balang bad ki paid riewngeit ka Balang Presbyterian ba hap ha katei ka pastorate.
Kane ka jingtei ïa kane ka ophis treikam ba pura ka Narleiñ Nongbah Pastorate, la mang lyngba ka skhim kyrpang ba la tip kum ka Special Rural Works Programme (SRWP) ha ka jinglut kaba la kot Rs. 5 lakh. Ki Balang kiba hap ha kane ka Pastorate ki kynthup ïa ka Balang Mawrong, Umkei, bad ka Balang Mawsyiem bad kiba hap ruh ka jingpeit jingkhmih ka Kynhun Balang Kseh Kynjoiñ, haka juh ka sngi naka liang u MLA u la ïoh ruh ban aiti kawei ka Laptop sha ka CE Society
Haba kren ha kane ka sngi naka liang u Bah Charles Marngar u la ai ka jingïaroh ïaka jingïohi jngai jong ka Pastorate bad kane ka dei ka dei ka jingsdang jong ka jingïarap ha kaba kum u nongmihkhmay un dang ai ka jingtreilang ban dang pynkhraw shuh shuh ïaki kam jong ka Pastorate ryngkat ka jingkyrmen ba ka Pastorate kan lah ban pyndep kloi ïakatei ka jingthmu haka por kaba biang naka bynta ba kin lah ban pyntyllun ïaki kam ki jam.
