Shillong, Jylliew, 17: Ka Sorkar Jylla ka la pyllait pisa T. 72 klur ban siew bailutksan na ka bynta ban thied jaka shuh shuh sa 6 akar na ka bynta ban shna pynheh ïa ka surok pynher liengsuiñ ha Shillong Airport kaba don ha Umroi, Ribhoi District.
“Ïa ka pisa ladep pyllait na ka bynta ban siew ïa ka bai thied jaka,” la ïathuh u Symbud Myntri Rangbah uba khmih ïa ka tnat Transport Bah Sniawbhalang Dhar.
U la pyntip ba ladep pynbna paidbah ïa ka Tender bad ka jingshna ïa ka surok pynher liengsuin kan sa sdang noh shen.
Ka kynhun Myntri ha ka 4 tarik Jylliew, ka la ai jingmynjur ban thied jaka sa 6 akar na ka jingdonkam jaka shuh shuh sa 11.75 akar ban shna pynheh ïa ka surok pynher liengsuiñ.
4.3 akar ka jaka ka dei kaba hapoh ka tnat Defence ne jaka shipai.
La thaw ïa ka committee ba la khlieh da u Deputy Commissioner ban ïakren sngewthuh jingmut halor ka dor ka mur bai jaka bad ki trai khyndew bad ïa kiwei kiwei ki jingsiew ba dang dei ban hap ban siew.
