Diaw u Myntri Sorkar Pdeng bym pyntreikam hok ka Sorkar Meghalaya ïa ki skhim pynroi

Shillong, Jylliew, 20: U Myntri Khynnah ka Sorkar Pdeng uba peit ïa ka tnat Ministry of Minority Affairs u John Barla ha ka sngi Baar u la bthah ïa ka Sorkar Jylla ba kan phah ïa ka jingtyrwa ha kaba ïadei bad ka jingbhah ïa ki kam pynroi hapoh ka jylla Meghalaya.
“Nga la bthah ïa ka Sorkar Jylla ba kan phah ïa ka jingtyrwa na ka bynta ban bhah ïa ki song pynroi hapoh Meghalaya,” ong u Barla ha ka jingïakren bad ki lad pathai khubor.
Une u Myntri ka Sorkar Pdeng u la kam ruh ba ka jingpynshai bad ka jingpyntip paidbah ïa ki skhim ka Sorkar Pdeng ha Meghalaya ka dang duna bha haduh katta katta.
“Bun tylli ki skhim ym shym la lah ban pyntreikam ha ka jylla na ka daw ka jingbym pynshai paidbah,” ong u Barla haba bynrap ba naduh mynta ym pat don uwei ruh napoh ka jylla Meghalaya ban aplai ïa ka Padho Pardesh Scheme kaba ju ai jingïarap pisa ha ka dur ka ram haduh T. 20-30 lak sha ki samla pule kiba angnud ban pyndep ïa ki jingpule kiba shalor shabar ka ri India.
U Barla u la ong ruh ba ka donkam ïa ka Sorkar Pdeng bad ïa ka Sorkar Jylla ban ïatreilang na ka bynta ka roi ka par jong ki paidbah nongshong shnong ha kane ka jylla.
Hapoh ka Ministry jong u, u la ong ba ki don bun tylli ki kam kiba lah ban leh kum ha kaba tei ïa ki Residential School, ki hospital, ki jaka ai jingsumar ne health centre, ki iingdorbar bad kiwei kiwei.
“Hynrei, ka jingtyrwa ka dei ban wan ka Sorkar Jylla namarba ka Sorkar Pdeng ka long kaba kloi ban ai jingïarap. Lada ki wan shiliang kjat, ngin wan baroh ar tylli ki kjat ban wanrah ïa ki song pynroi ha Meghalaya,” la kular une u Myntri Khynnah ka Sorkar Pdeng.
U la ïathuh ba T. 247 klur la mang lyngba ka Ministry for Minority Affairs ban tei ïa ki Stadium, ki Health Centre, ki Women Hostel, ki Sports Complex, ki Shopping Complex bad ka kam mynta ka dang ïaid shakhmat.
Ha ka jingïakynduh jong u ïa u Myntri ka tnat ka Koit ka Khiah ka Sorkar Jylla u James PK Sangma ha ka jingïashim bynta ha ka International Yoga Day kaba la long ha NEHU, u John Barla u la ong, “ngi la ïakren bad nga la ong sngewbha phah sha nga ïa ka jingtyrwa…. kin hap wan sha Delhi bad ngin ïashong ban ïakren halor ki song pynroi na ka bynta ka ban sa wan.”
Shwa kane, ha ka jingwan jngoh kaba saw sngi ïa ka jylla Meghalaya, u John Barla u la ïakynduh ïa ki nongïalam Niam bapher bapher hapoh ka Jyllla. U la ong ki kynhun Niam ki la trei shitom bha ha kaba pynïaid ïa ki skul, ki jaka sumar bad ki kam ba bha ha ka imlang sahlang khlem da ïoh jingmyntoi eiei na ka Ministry na ka daw ka jingbym don ka jingpyntip kaba thikna.
“Lada phim shym la aplai, kumno kan wan ka roi ka par ha Meghalaya,” u la ong.
Ha kaba ïadei bad kane, u Barla u la ïathuh ba u la bthah ïa ka Sorkar Jylla ban pynlong ïa ki jingpyntip bad ki jingpynshai khnang ban pyntip sha ki paidbah shaphang ki skhim bapher bapher kiba don hapoh ka Ministry bad ka Sorkar India.