Khliehriat Jylliew 21: Ka surok national highway ha ki thaiñ Narpuh, East Jaiñtia Hills District, khamtam ha ki thaiñ Lumshnong hajan ka Lad Brichyrnot kaba la twa myn ha kine ki sngi na ka daw ka jinglynshop ka um, mynta ki kali heh bad ki kali rit ki la ïaid tang shiliang na kane ka surok, ha ka jingjurip, la lap ba ha ka jingshisha kane ka bynta jong ka surok ka dang buh jingma ïa ki nongleit nongwan, khamtam ki kali kiba kit jingkit.
Na ka liang ki bor pulit ki la shim khia ban pyniaid ïa ki kali ha kane ka bynta jong ka surok, kumjuh ruh ki nongtrei jong ka National Highway Aouthority of India, ki la sdang ban pyntrei bad shna ïa kane ka surok tang ban ïoh ïaid ki kali kiba hiar bad kiba kiew.
Ki don ruh ki jaka ha ka surok national highway kiba ym pat lah ban pynkhuid lut ïa ka khyndew kaba hap bad la khmih lynti ba ki nongtrei jong ka NHAI kin shim khia ban pynkhuid ïa ka khyndew kaba hap ha surok NH-6.
Kum ban shu pynkynmaw, u District Magistrate jong ka East Jaiñtia Hills District, myn ha ka 17 tarik mynta u bnai u la pynmih ïa ka hukum ba la pynjari da ki kyndon aiñ 144CrPC ha ka surok national highway-6 ha East Jaiñtia Hills District, ha kaba la hukum ba ki kali heh bad ki kali kiba kit khia palat ïa ka 3 ton kim lah ban ïaid na kane ka surok na Lumshnong kaba don hajan ka Tool gate Plaza kaba hajan ka Lad Brichyrnot.
Katkum ka hukum la shah tang ki kali rit ban kiba kit duna ïa ka 3 ton ka jingkhia ban ïaid lyngba na ka surok na Lumshnong, la maham ba ki kali heh kim dei satia ban iaid na kane ka surok bad lada don kino kino ki kam ba kyrkieh ne ban pynpoi ïa ki mar kiba donkam kyrkieh, la bthah ba kin wadlad noh da kawei ka lynti, lane ki lah ban shu ïa phah kit kylliang noh da kiwei pat ki kali, namar ïa ki kali heh yn shah shuh ban ïaid tat haduh ban da dep lut ïa ka jingmaramot ne shna ïa ka surok.
Katkum ka hukum la ong ruh ba ka jinglong jingman ka surok ha Lumshnong bad ha kiwei kiwei ki bynta jong ka surok ka buh jingma ïa ki nongleit nongwan.
Na ka liang ki bor synshar district jong ka East Jaiñtia Hills District, ki pynkynmaw ruh ïa kito kiba iaid lyngba da ki kali rit ba ki dei ban da long adkar bad ïaid phikir bha haba iaid lyngba na kane ka surok NH-6.
