Shillong, Jylliew 21: Uwei Chowkidar jong ka jaka thung dieng ka KHADC, u ba kyrteng u Bah F. Khymdeit, u la bam tuh haduh kumba 37 lak tyng ka pisa jong ka District Council.
Ka jingtohkit ka la lap ïa kane ka jingbam tuh une u nongap pahara ïa ka khlaw thungdieng, kaba la jia ha ka snem 2011-’12 haduh ’13. Hadien ka jinglap jong ka jingtohkit, ïa kaba une u Chowkidar u la phla bad kubur ruh ïa kaba u la leh, na ka liang ka KHADC kam shym la shim kano kano ka jingpynshitom, hynrei ka la shu khate da ka tulop na u 10 hajar man la u bnai.
Ïa kane la ïathuh da u Bah Titos Chyne, CEM ka KHADC mynta ka sngi haba ïakren bad ki nongthoh khubor, hadien ba la wai ka jingïalang jong ka Executive Committee.
“Kane kadei kaba la jia ha ka snem 2011-2012 bad 2012-2013 bad ka Jingtohkit ruh ka la pynkut ïa kane ka kam da kaba khate tulopna une u Chowkidar”, la ong u Bah Titos.
Haba la kyli kumno kat 37 lak u la pyndonkam bakla, ka KHADC ka shu ot tulop ïa u. U Bah Titos, u la ong ba kaba lah ban pynshitom ïa une u nongtrei ka long tang ban phah kem ïa u bad lada leh kumta, ka mut ïa ka pisa pat ym ïoh shuh. Te kaba kham biang ka long ban shu khate tulop na u namar ka Council ka ïoh biang ïa ka pisa ba u la tuh.
Ha kajuh ka por ka KHADC, ka la phah siew ruh ïa u Chief Forest Officer 1 lak tyngka shi bnai na ka 5 lak tyngka kaba kaba daiñ kuna ïa u kum u khlieh jong ka Forest Department ha kaba ka jia kane ka jingdie bad leh buit tuh halor ka jingdie tuh ïa ki dieng.
