Shillong, Jylliew, 20: Ha ka sien banyngkong eh ha rilum Garo, ki shipai Suiñ jong ka Indian Air Force kin sa leit ban pynhap ïa ki marbam mardih sha ki lanot kiba la shah ktah ha ka jingshlei bad twa khyndew ha ki shnong kiba don ha South West Garo Hills District.
Ki shnong ha South West Garo Hills kiba la shah ktah ki long ka Siju, ka Rongara, ka Mahadeo, bad ka Maheskolaha kaba ka surok kaba ki nongshong shnong ki ju pyndonkam ha ka leit ka wan ka la dkut na ka jingtwa khyndew bad ka jingshlei um kaba la jia ha ka 17 tarik mynta u bnai ha kaba katto katne ngut ki briew ki la duhei ïa la ka jingim bad wanrah ruh ka jingjulor jong ki iing ki sem.
Ka jingther jong u lapbah kaba dang ïai bteng haduh mynta, ka la pynshlei um ïa ki shnong ki thaw ha ki katto katne ki distrik jong ka jylla. Ki distrik kiba la shah ktah ki logn ka East Khasi Hills, ka West Khasi Hills, ka Southwest Khasi Hills, ka Ri-Bhoi, ka East Garo Hills, ka West Garo Hills, ka North Garo Hills, ka South Garo Hills, ka South West Garo Hills, ka East Jaiñtia Hills bad ka West Jaiñtia Hills.
U Myntri Rangbah da lade hi ha ka sngi Baar u la hiar jurip ïa ki shnong ba la shah ktah ha West Garo Hills bad leit jngoh ïa ka jingkieng Koinadubi kaba pynïasoh ïa ka shnong Megadop bad Tibapara kaba la shah pynjulor ha ka jingther jong u lapbah.
Na ka liang jong u Myntri Rangbah u la bthah ïa ki bor synshar distrik ba kin maramot noh marmar ïa kane ka jingkieng bad ban peit ruh ba kan ym don kano kano ka jingduna marbam ha ki shnong kiba marjan.
“Ha Nagupara kaba hap hapoh ka Dalu Community and Rural Development Block, West Garo Hills nga la leit jngoh ïa ka jingkieng kaba la dkut mar shiteng na ka jingjur jong u lapbah. Nga la bthah ïa ki bor synshar distrik ba kin shna noh mardor ïa ka jingkieng bad ban peit ba kan ym don kano kano ka jingkyrduh bam ha ki shnong kiba marjan,” u la ong.
Katkum ka jingai jingkheiñ jong ka State Disaster Management Authority (SDMA) haduh mynta ki don 924 tylli ki shnong kiba la shah ktah na ka jingshlei um bad ka jingtwa khyndew kaba la jia naduh ka 1 tarik, Ïaiong, 2022. Ki paidbah kiba la shah ktah na ka jingwan lynshop ki bor ka mariang ki long 6,33,929 ngut.
Ka jingïap briew ka la kynton haduh 34 ngut, 11 ngut ki dang jah rngai bad 22 ngut kiba la mynsaw.
Ka jingjur shaba palat ka jingshlei um ka la pynjulor haduh 3,863 hajar tylli ki iing.
Haduh 4202 ngut ki briew la pynsah ha ki ktem sah ba shipor bad ka jingshah ktah ki jingthung jingtep ka long da ki phew hektar ha baroh kawei ka jylla.
