Da Panel Discussion halor u drok pynlong ka Life Care Foundation ha Sohkhyllam

Mawkyrwat, Jylliew 16 : Kum shibynta ka jingrakhe ïa ka “International Day Against Drug Abuse and Illicit Trafficing”, na ka liang ka Life Care Foundation, South West Khasi Hills District ka la pynlong ïa ka Panel Discussion ne jingïatai halor ka phang, “Ka jingpyndonkam ïa ki drok beaiñ bad u drok u pynïap” ba la pynlong ha Rehabilitation and Councelling Centre ha Sohkhyllam, South West Khasi Hills District.
Ha kane ka sngi la ïoh ban ïathir bad ïatai halor ka jingpyndonkam ïa ki drok kiba khlaiñ kiba pynkulmar ïa ka jingmut jingpytkhat jong u briew ha kaba ka Clinical Psychologist napoh ka District Mental & Health Programme, ka kong Alcydalin Lyngkhoi ka la ïoh ban batai bniah halor ki jingktah jong u drok bad ym tang kata ka la ïoh ruh ban ïatai halor ka phang, “kumno ban leh khnang ban khang lad ïa ki nongdie drok”.
Shuh shuh ha kane ka jingïalang ka kong Alcy ka la batai ruh ha ryngkat ka jingkyntu bad maham ha kajuh ka por ïa kito ki bym pat mlien ba kim dei ban tare namar lada lah sdang ka la eh ban bthat bad ka ai jingmut ruh ïa kiba la mlien ban dih drok ba la kumno kumno ki dei ban don ka jingrai kut ha ka mynsiem ba ki dei ban ieh noh noh ïa une u jingdih (drok) namar u ktah ym tang ïa u shimet hynrei ïa ka ïing ka sem, ka shnong ka thaw, ka imlang ka sahlang bad ka ri ka jaidbynriew ruh namar u long uba stet bha ban pynngop ïa ki briew khamtam ha kum kine ki juh ba mynta.
Kiwei de kiba la wan ïashimbynta ki long da ki Seng Samla jong ki Balang bapher bapher jong ka thaiñ Mawkyrwat ha ryngkat ka jingdonlang u Pastor L.E. Jyrwa, u Babu Bording Lyngdoh, u bah Stepping Stone Syiemlieh, u bah Rickle Marngar bad kiwei kiwei.