Mairang, Jylliew 16: Kum shi bynta ban leh eiei halor ka sngi kyrpang jong kiba la san ha ka rta, ia kaba la tip kum ka World Elder Abuse Awareness Day, ka District Legal Services Authority (DLSA) West Khasi Hills District ha ka sngi ka 16 tarik Jylliew 2025, ka la pynlong ïa ka jingbatai pynshai halor ki hok jong kiba la san ha ka rta ne ki riew tymmen ha ryngkat ka jingshah sumar ei ha kaba ïa dei bad ka koit ka khiah jong ki khlem da donkam ban siew pisa.
Kane ka prokram la pynlong ha God’s Dream Old Age Home kaba don ha Kynshi Mawteijrong, Eastern West Khasi Hills District, ha kaba ka Chief Judicial Magistrate cum DLSA Secretary Nongstoiñ Kong D.M.K.S Shadap, ha ka jingkren jong ka, ka la batai halor ki skhim sorkar kiba la mang kyrpang na ka bynta ki riew tymmen, ka la batai ruh halor ki hok jong ki ba ki dei ban ïoh.
U Assistant Legal Aid Counsel bah C. Kharsyntiew ha ka jingkren jong u, u la ong ba ha kylleng ki ri ki don bun ki riew tymmen kiba la shah leh bym dei bad shah ieh ha kiba haïing hasem khlem don nongpeit snong sumar ïa ki. Ha kaba ïa dei bad kane u la pynshai ba ki don ki aiñ kiba teh ban pynioh bad ïada ïa ki hok jong iwei pa iwei kiba la kot ka rta 60 snem shaneng.
Hadien jong ka awareness session, pynbud pat sa da ka free medical check-up ha ryngkat ka jingsam ei ïa ki dawai dashin katkum ka jingbthah ki doctor hadien ba la dep ïa ka screening. Kane ka program la pynlong da ka jingtrei mon sngewbha bad ka jingshimkhia jong ka DLSA bad ka Health department hapoh ka jingbtin lynti jong ka National Legal Service Authority.
