Jowai, Jylliew 15: Ka Jowai Hospital Blood Bank Centre, Panaliar ha ka sngi Saitjaiñ ka la leh burom kyrpang ïa ki riewshimet kiba ju noh synñiang ïa la ka snam manla ka por ha kane ka jaka kynshew snam kaba don ha Jowai.
Ka jingpynkup burom ka long shi bynta na ka jingrakhe ïa ka ‘World Blood Donors Day’ mynta u snem halor ka phang “Give Blood, Give Hope: Together We save lives”.
Ha kane ka sngi la donlang da u Additionally SP u Ishan Gupta, kum u kongsan uba la pynpaw ïa ka jingsngewnguh kaba khraw ïa baroh ki nongai snam da ka mon sngewbha.
U Gupta, ula ïathuh ruh shaphang ka jingjia ba dang shen na ka jinghap jong kawei ka liengsuiñ bad palat 200 ngut ki briew ki la duh noh ïa la ka jong ka jingim bad kumba 100 ngut ki briew ki la mynsaw bad kane ka la buh jingeh ïa ka tnad ka koit ka khiah bad khamtam eh ïa ka kynhun ai jingsumar ba kyrkieh.
Kum ka dak ban leh burom u la khot sngewbha ïa baroh kiba la don bynta lang ha kane ka sngi ban pynlong ka jingsngap jar ba shipor bad ban buh ka jingduwai ïa kito kiba la duh noh ïa ka jingim na katei ka jingjia.
U la pynsngew ïa ka jingeh kaba u ïa kynduh mynba u dang don kumba 15-16 snem ka rta na ka bynta ka jingdawa snam ka para jong u na ka jingpang bad kum ka ïing ka sem ha kata ka por ki la donkam kyrkieh ïa ka snam. U la ong lyngba kane ka jingjia ka la pynshai ha u haduh katno ka jingai snam ka long kaba donkam bad kaba kongsan ban pynim ïa ki mynsiem briew.
Kiwei kiba ai jingkren ki long u Co-ordinator CSR Dept Star Cement u Kingshok Kamal Bora, ka Senior Medical & Health officer I/C JCHBC ka Dr. I.Khyriem, u dkhot ka Sarot -I- Man Committed Blood Donor u bah Kylli Mot Lhuid ryngkat ka jingdonlang Medical Superintendent jong ka Jowai Civil Hospital Dr. D. Lakiang, u Lab. Technician Bah Williambor Sumer, Staff Nurse Kong Memory Lamin bad kiwei kiwei.
