Shillong, Jylliew 21 : Kum shi bynta ban pynshlur bad ban ai mynsiem ïa ki samla pule, ka Mawsynram Constituency Welfare Organization (MCWO) kan sa pynlong ka jingpynkup burom ïa ki samla pule jong ka thaiñ Mawsynram kiba la pass bha ha ki eksamin SSLC, HSSLC ba pynìaid da ka MBoSE mynta u 2022 haduh ki Degree.
Ïa kane ka jingpynkup burom la kyrshan lang da u MLA ka thaiñ Bah HM shangpliang. Haba pynbna ïa kane ha ka sngi Ba ar u President jong kane ka kynhun u Bah Section Syiemlieh u la ïathuh ba ïa kane ka jingpynkup burom la sdang naduh u 2017 haduh 2019 hynrei ha ki ar snem la pynsangeh noh na ka daw ka jingwan lyngshop ka khlam jingpang COVID-10.
“Ïa kane ka jingpynkup burom ngi la sdang naduh u 2017 haduh u 2019 bad ngi la thmu ban pynlong mamla u snem hynrei ha u 2020 bad 2021 ngi khlem ïoh shuh ban pynlong na ka daw ka jinglyngshop ka khlam COVID hyrnei mynta ngi sngewkmen ban pyntip ba mynta u snem ngin sdang biang ban pynkup burom ïa ki samla pule ka thaiñ kiba la pass ha ki result ba dang shu pynbna dang shen da ka MBoSE,” ong u Bah Section Syiemlieh.
U la pynpaw ruh ka jingai khublei ïa u MLA ka thaiñ Bah HM Shangpliang uba la ïarap naduh kaba sdang haduh mynta ban pynkup burom ïa ki samla. Shuh shuh u la pyntip ruh ba ki samla kiban shah pynkup burom kidei tang kito kiba ïoh 60 percent shaneng bad ïa ka tarik ban pynlong ïa katei ka jingpynkup burom yn sa pynbna pat hadien.
“Ki samla kiba pass ha ka eksam SSLC bad HSSLC kin pynpoi ïa ki syrnot kynthup naduh ka marksheet hapoh ka 15 tarik Naitung ha ophis treikam jong ka Offset Printing Press kaba don ha Umsohsun bad ïa ka tarik ban pynlong ïa katei ka jingpynkup burom ngin sa pyntip pat hadien ynda ki samla pule degree ki la ïoh ïa ka result namar ngin pynkup burom lang ha kajuh ka sngi,” u la ong.
U la kyntu pat ïa kiwei ki samla pule kibym shym la kot sha ka 60 percent ba kim dei ban duh mynsiem hynrei ba kin nang trei shitom ha ki jingpule jong ki ha kiwei pat ki snem.
Haba bynrap lang halor kane na ka liang u Bah Barister Kynter uba dei u General Secretary u la ai khublei ïa khamtam eh ïa u Bah HM Shangpliang uba dei ka bynta ba hakhmat eh ba ka kynhun kan pynkup burom ïa ki samla pule jong ka dong ka thaiñ kiba la pass bha ha ki eksamin mynta u 2022.
