Shillong, Jylliew : Ka Ministry of Minority Affairs bad ka Ministry of AYUSH, sorkar India ha ryngkat ka jingïatreilang bad ka sorkar Meghalaya hynne ka sngi ki la rakhe ïa ka “8th International Day of Yoga 2022” halor ka mat “Yoga for Humanity”, ha ka prokram ba la pynlong hapoh Convocation Hall, North Eastern Hill University (NEHU), Shillong.
Ha kane ka sngi la ïa don lang ruh u Myntri khynnah ka sorkar pdeng u ba khmih ïa ka tnat Minority Affairs, u John Barla kum u Kongsan bad u James P.K. Sangma, Myntri ka tnat Health & Family Welfare kum u Symbud Kongsan.
Ha ba aijingkren ha ka jingïalang u John Barla u la ong ba kane ka jingrakhe mynta ka snem ka long ka ba kham kyrpang namar ka ri baroh kawei ka la rakhe ruh ïa ka lyngkhuh snem ka ba 75 jong ka jingïoh jinglaitluid (Azadi ka Amrit Mahotsav).
Da ka ba pynpaw ba ka jingleh yoga kam dei ban kut noh tang mynta ka sngi ba la rakhe ïa ka, une u myntri u la ong ba ka yoga ka dei ban long ka bynta jong ka jingim ka ba man la ka sngi bad ruh ban pynphriang ïa kane ka khubor sha baroh ki longïing khnang ban poi sha ka thong ban pynlong ïa ka India ka ba bit ba biang bad ka ba koit ba khiah.
Kumjuh na ka liang u James Sangma ha ka jingkren u la pynpaw ïa ka jingkmen ka ba khraw ban ïoh ïa ka lad ban ïashim bynta ha kane ka jingrakhe mynta ka snem, bad u la ong ruh ba ka long ka jingsarong ban long u nong India namar ka Yoga ka dei ka ba la don tynrai na kane ka ri India.Nalor kata u la ong ruh ba ha kane ka juk ka ba mynta ha ka ba ki briew ki la leh klet ha ka ba ïadei bad ka koit ka khiah ha ka bor pyrkhat pyrdaiñ bad ha ka jinglong ka met ka phad kumjuh, kumta ruh ka jingleh yoga ka long ka ba donkam haduh katta katta na ka bynta ban tehlakam ha ka ba ïadei bad ka jingdonkam halor ka koit ka khiah ha ki ba bun rukom.
Shi bynta jong kane ka prokram na ka liang u Myntri Rangbahduh ka ri u Narendra Modi u la ai ïa ka jingkren sha ka ri lyngba ki kor internet napoh Mysuru, Karnataka.
Shuh shuh ha kane ka prokram ïa ka jingleh kilan met yoga la lamkhmat da ka kynhun jong ka North Eastern Institute of Ayurveda & Homoeopathy (NEIAH), Shillong.Ha kane ka jingkilan met la sakhi ruh ïa ka jingwan ïashim bynta jong kumba 800 ngut ki briew, kata ki ba kynthup ïa ki samla pule jong ka NEIAH, Shillong Polytechnic bad na ka tnat pahara nalor kiwei pat.
