Ka shong ha u Myntri Rangbah ban kylliang shuki Myntri ïa u Bah AL Hek bad Bah Sanbor

Shillong, Jylliew 14 : U President ka BJP Meghalaya,u RG Momin ha ka sngi Saitjain u la ong ba ka shong ha u Myntri Rangbah ka Jylla, Conrad K Sangma ban rai halor ka jingong ban kylliang shuki Myntri Sorkar, lada hap ban kylliang noh ïa ka shuki Myntri kaba bat mynta da u Bah AL Hek, MLA ka Pynthor bad aiti noh pat ha u MLA Shillong South, Bah Sanbor Shullai hadien ba la kut ka samoi treikam kaba mar arsnem shiteng.
Ïa kane, u President ka BJP u la ong haba kren bad ki lad pathai khubor halor ka jingkylli ïa ka bynta ba ka party ka don haba ïadei bad ka jingkylliang shuki Myntri hapdeng ki arngut ki MLA ka party, kata hapdeng u Bah AL Hek bad u Bah Sanbor Shullai.
Da kaba kyntait ban ong ei ei la kane ka jingkylliang shuki myntri kaba mar arsnem shiteng kan long biang kumjuh kumba la leh ha ka sorkar MDA hapdeng kitei ki arngut ki MLA, na ka liang u President u la ong, “Ïa kane ngam ym pat lah ban jubab ïa mynta hi.”
Shuh shuh u la ong ruh ba um pat don jigtip ei ei shaphang kata ka jingïapynbeit tangba u ong ba ïa kane ka kam hi ka shong ha ka rai jong u Myntri Rangbah ka Jylla.
“Ïa mynta ym pat lah ban ong ei ei. Hynrei haba ka por ka la poi, ha kata ka por ngan sa ïathuh lut ïaphi,” u la bynrap biang.
Lah ban kdew hangne, u Bah Sanbor Shullai jan man la ka por u ju pynpaw ba ki nongïalam ka party ki la don ka jingïa pynbeit ba ïa ka shuki Myntri yn ïa sam mar ar snem shiteng hapdeng ki ar ngut ki MLA jong ka party kumba la leh ha ka samoi ba la dep.