Hadien ka jingjia ha Sohra, rai ka sorkar ban pynkhlaiñ shuh shuh ïa ki kyndon ka MRSSA, 2016: Paul

Shillong, Jylliew 13: Ka sorkar jylla ka la rai ban pynkhlaiñ bad ban pyn nep shuh shuh ïa ki bniat jong ka ain Meghalaya Residents, Safety and Security Act (MRSSA), 2016 kaba mynta khnang ban pynduna ïa ki jingwan ki jingjia ki kam runar kiba ïoh ban rung sha Meghalaya da ka nam ba ki dei ki nongwan jngohkai pyrthei.
Kane ka jingtyrwa ka la long kongsan hadien ka jingjia shah pynïap jong u nongwan jngohkai na Indore, jylla Madhya Pradesh u (L) Raja Raghuvanshi ha ka jingleit honeymoon sha Sohra bad la ka kurim jong u ka Sonam Raghuvanshi.
Haba kren sha ki lad pathai khubor hadien ka jingïalang ka kynhun Myntri u nongai ktien ka sorkar MDA bad u Myntri sorkar u Bah Paul Lyngdoh u la ong, “Ka jingïalang ka kynhun Myntri mynta ka sngi ka la rai ban bishar kam biang ïa ka MRSSA kaba la dei lypa ka aiñ kaba la don jong ka jylla ban khlaiñ shuh shuh ïa ka ban shut pyn nep ïa ki bniat jong kane ka aiñ halor kaei kaba ngi dang shu dep mad ïa kaei kaba la jia ha Sohra bad ban pynthikna ba ngin pynduna ïa ka jinglah ban don ki kam runar kiba wanrung sha ka jylla Meghalaya da ka nam kum ki tourist.”
Haba ïadei bad ka jingpyrshah ba pynslem ka jingpyntreikam ïa ka inner line permit (ILP) ha Meghalaya, u Bah Lyngdoh u la ong ba kane ka kam ka dangsah kut hakhmat ka Ministry of Home Affairs (MHA).
“Ha kaba ïadei bad ka jingsngewkhia halor ka jingdonkam ïa ka ILP, shah ïa nga ban pynkynmaw ba ka Ïingdorbar Thaw aiñ ka la dep shim da ka rai (resolution) jong baroh ki MLA. Kumta kane ka kam ka dangsah kut hakhmat ka tnat ki Kam Pohïing ka sorkar pdeng (MHA), kaba la buh ruh hakhmat ïa bun tylli ki jingkylli, ha kaba ka sorkar jylla ka dang pyrshang ban jubab. Katto katne na kine ki jingkylli kiba dei ki jingshisha ka long ba ka Meghalaya kam dei ka jaka kaba kut, hynrei ngi ïasoh ruh bad kiwei ki jylla ka thaiñ shatei lammihngi kum ka Silchar bad ki jylla kum ka Mizoram bad Tripura,” u la bynrap.
Haba kylli u Bah Lyngdoh u la ong, “Hynrei lada phi leit lyngba ka MRSSA, ki la dep don lypa shibun hynrei ngi donkam ban pynkhlaiñ bad ban pynbha shuh shuh ïa kaei kaba la dep don lypa hapoh ka MRSSA.”
Katkum ka jingïathuh jong u, ka sorkar jylla shen kan sa wanrah ki jingtyrwa na ka bynta ban pynkhlaiñ shuh shuh ïa ka MRSSA.