Bthah ka ïing Bishar HC ïa ka sorkar ban shim khia ba lait tuh ka khajna haduh 640 klur tyngka na ki Weighbridge

Shillong, Jylliew 13 : Ka Iing Bishar High Court jong ka jylla ha ka sngi Thohdieng, kala bthah ïa ka Sorkar Jylla ba kan leh eiei halor ka jingkynnoh duh ei ïa ka khajna ba T.640 klur namar ka jingbym lah ban talasi bad kem ïa ki kali ba kit mar palat pud ha ki 28 tylli ki weighbridge ne khyrdop lum khajna bad ka jingbymdon kine ki khyrdop ha ki jaka ba kongsan hapoh ka Jylla.
Ha ka hukum bala pynmih hadien ba bishar ïa ka PIL bala mudui da u nongtrei monsngewbha Tennydard M Marak, ka Division Bench ba kynthup ïa u Chief Justice IP Mukerji bad Justice W Diengdoh kala ong “Ngi don ka jingsngew ba ka jingduhei ïa ka khajna ka dei kaba kongsan bha ha kane ka mukotduma”.
“Ngi bthah ïa u Principal Secretary ka Tnad Transport ban bishar bniah ïa ka jubab jong u nongmudui bad ban file ïa ka affidavit ba pyrshah ha kane ka ïing Bishar hapoh ka 5 tarik Naitung, 2025, kaba kren halor ka jingkynnoh . Ka Sorkar ka dei ban leh eiei haba ïadei bad kane ka jingkynnoh, lada shem ba ka long kaba shisha” kala bynrap.
U Tennydard ha ka mudui ula kynnoh ba ki don bun tylli ki jaka ba kongsan ki bym don satia ïa ki weighbridge, ki kam be-aiñ bala leh da ki Nongtrei Sorkar ha ki 28 tylli ki weighbridge kynthup ka jingdonkti jong kito ki nongtrei ha ka jingailad ïa ki kali ba kit mar palat pud ba kin ïaid na weighbridge khlem da thew.
Kane nalor kiwei kiwei kala lam sha ka jingduhei ïa ka khajna ba T.640 klur sha ka Sorkar.
Ha kajuh ka por, u Tennydard ula tynjuh pyrshah ïa ka kaiphod bala aiti da ka Sorkar ba la leh ïa ka jingjurip ha ki 24 tylli ki weighbridge bad la shem ba ha baroh kine ki weighbridge, ym shym la lap satia ïa ki trok ba kit palat pud ba kin ïoh ïaid lyngba ki weighbridge.