Shillong, Jylliew, 13: Tang hapoh katto katne kynta ba ki dkhot sengbhalang kiba don hapoh ka shatri jong ka Confederation of Meghalaya Social Organisation ki la tur paidbah sha Secretariat ban pyrta shla ïa ka jingdawa ïa ka Inner Line Permit, ka District Magistrate jong ka East Khasi Hills District ka Kong RM Kurbah ha ka 13 tarik Jylliew, 2025 ka la pynjari da ka Section 163 jong ka BNSS kaba mana ïa kino kino ki briew lane ki kynhun ban pynlong ïa ka jingïakhih ne ban ïaid rally hapoh 200 mitar na ka Meghalaya Secretariat Building, ka Additional Secretariat Building bad ka Raj Bhavan, Shillong.
Katkum kane ka hukum la mana ban rah ïa ki tiar pynmynsaw ne kino kino ki tiar kiba lah ban pyndonkam kum ki tiar kiba lah ban buh jingma ne ban pynmynsaw ïa kino kino ki briew.
Ka Hukum ba la pynjari ka la maham ruh ba kino kino kiba pynkhein ïa kane ka hukum kin ngat ha ka jingshah pynshitom hapoh ki kyndon jong ka Section 223 jong ka BNS bad ha kiwei kiwei ki kyndon kiba idei ban pyngat.
Namar ba ka kam ka long kaba kyrkieh, kane ka hukum kan treikam noh mardor tad haduh ban da pynbna da kumwei pat.
