Mawkyrwat, Jylliew 13, 2025: Ka Mawlangwir Sports Club ka la ïoh ban pynkut noh ïa ka lympung ïalehkai kynjatbol kaba la tip kum ka Mawlangwir Inter-Dong Football League jong ka snem 2024-2025 ba la pynlong ha Rowell Lyngdoh Stadium, Saitsnad, Mawlangwir, South West Khasi Hills District, Mawkyrwat.
Kumta, ha kaba ïa dei bad ka jingsdang ïa ka jingïalehkai, ka Sports Club lyngba ka Football Committee ka la ïoh ban sdang ïa kane ka Football League naduh u bnai ‘Nailar jong ka snem 2024. Ha kane ka league, la phiah sha ki lai tylli ki category, kita ki long ka Under 17 Boys’ Category, Women’s Category bad ka Senior Men’s Category.
Ha ka Men’s Category, ka Mawbah Football Team ka la long ka lahduh hadien ba ka ïakhaid khlem ïoh thep kol pyrshah ïa ka Lakhang Football Team. Kane ka league jong ki Senior Men ka long kaba pynkyndeh mynsiem bha namar ba hadien ba la pyndep lut ïa baroh ki jingïalehkai, lai tylli ki kynhun, kita, ka Eitser Dileiñ FT, ka Lakhang FT bad ka Mawbah FT ki la khur mar 16 poiñ. Namarkata, la hap ban pynshong nongrim noh ïa ka nongjop da ka goal difference. Namar ba Mawbah FT ka la tam bun ïa baroh ha ka goal difference, kumta ka la khur ïa ka nam nongjop. Kumta ka la lah ban bat biang ïa ka nam kaba ka la bat ha ka snem ba la dep. Ha kane ka jingïalehkai, u kongsan u la long u bah F.D. Ramsiej, uwei na ki rangbah jong ka shnong Mawlangwir.
Ha ka Under 17 Boys’ Category, ka jingïalehkai ka la long hapdeng ka Eitser Dileiñ – Eitser Mawjaih FT bad ka Shiliangktieh – Lakhang FT. Kane ka jingïalehkai ruh ka la kut ha ka jingïakhaid khlem da ïoh pynkhih jar da baroh ar tylli ki kynhun. Hynrei namar ba ka Eitser Dileiñ-Eitser Mawjaih FT ka la tam poiñ ïa ka Shiliangktieh-Lakhang FT da 2 poiñ, kumta ka la ïoh ban rah ïa ka nam lahduh. Ha kane ka jingïalehkai, u kongsan u la long u bah S. Marweiñ, (MCS), Block Development Officer (BDO) jong ka Ranikor C&RD Block.
Ha ka Women’s Category, ka jingïakhun ka la long hapdeng ka Eitser Dileiñ-Eitser Mawjaih FT bad ka Shiliangktieh-Lakhang FT, ha kaba ka jingïakhun ka la kut ha ka jingïakhaid ba mar 0 – 0 kol. Hynrei namar ka jinglah ban tam poiñ jong ka Shiliangktieh-Lakhang FT da 2 poiñ ïa ka Eitser Dileiñ-Eitser Mawjaih FT, kumta ka Shiliangktieh-Lakhang FT ka la ïoh ban rah ïa ka nam jingjop. U kongsan ha kane ka jingïalehkai u long u bah C. Sohshang, MDC barim jong ka Mawkyrwat Constituency.
Ha baroh kine ki jingïalehkai, la ïoh ruh bam sam ïa ki khusnam nongthep kol ba bun tam, nongapkol na tbit tam bad nongïalehkai ba kynsai tam sha ki nongïalehkai.
