Shillong, Jylliew, 12: Ka Ingbishar Meghalaya High Court ha ka sngi Palei ka la pynsangeh noh ïa ka jingtreikam jong ka hukum ba la pynmih da ka Executive Committee ba la ïalam da ka Voice of the People Party (VPP) ha KHADC ha ka 30tarik Jymmang, 2025 kaba weng noh ïa ka jingpynskhem ïa ka kam jong ki 30 ngut ki nongtrei Casual.
Ka hukum ba la pynmih ha ka 30 tarik, Jymmang 2025 ka la ong ba la weng noh ïa ka jingpynskhem ïa ka jingshakri jong ki naduh ka 1 tarik, Jylliew, namarba la leh kumjuh ïa ki kyndon treikam. Hynrei ka jingthung ïa ki kum ki nongtrei casual kan dang ïai bteng.
Da ka jingsngewsih halor ka hukum ba la pynmih da ka KHADC, ki 26 ngut ki nongtrei ki la leit ujor sha ka Iingbishar ban tuklar, la ïathuh ka tyllong khubor.
Hadien ba la sngap ïa ka jingujor jong ki, ka Single Bench kaba la khlieh da u nongbishar B. Bhattacharjee ka la ong, “da kaba pyrkhat ïa ki jingkdew haneng, ha kane ka por, la shim ba ka long kaba dei ban pynsangeh noh ïa ka jingtreikam jong ka Office Order No.357 kaba 30.5.2025 tad haduh ka tarik ban bishar biang ïa kane ka kam.”
Uwei na ki nongtrei, u Banrikupar Suting u la kyrpad ban pynsangeh noh ïa ka Office Order No. 357 kaba la pynmih ha ka 30.5.2025 ba la pynmih da ka KHADC ha kaba la weng noh ïa ka jingpynskhem jong u nongaplai kum u Enforcement Constable bad la ailad ba un trei kum u Casual Enforcement Constable.
Ka hukum ka la ong ba ka paw na ki jingai jingmut ba la ai na ka bynta ki liang pyrshah bad ki tiar kiba don ha ka rekod ba ïa u nongaplai la thung kum u nongtrei Casual katkum ka hukum jong ka Office Order No. 528 ‘B’ dated 01 .0 6.2019.
Hadien ba la pyndep kumba 5 snem ka jingshakri kum u Casual Enforcement Constable, lyngba ka Office Order No. 585 kaba 14.08.2024, la pynskhem ïa ka jingshakri jong u nongaplai kum u Enforcement Constable da ka rai jong ka Executive Committee jong ka Khasi Hills Autonomous District Council (KHADC). Hynrei da ka hukum jong ka Office Order No. 357 dated 30.05.2025, ïa ka jingpynskhem ïa ka kam jong u nongaplai kum u Process Server la pynsangeh bad la pynphai biang ban trei kum u Casual Enforcement Constable.
“Ka hukum jong ka ophis, kam pyni ba ïa u nongmudui la pynmih da ka jingpynbna ne la ai kano kano ka lad ban bishar shwa ban shim ïa ka rai ban pyndam noh shwa ban shim ïa ka rai ban pynkylla noh ïa ka jingpynskhem kam kum u Process Server,” la ong ka ïingbishar.
“Watla ha ka Office Order, ka jingpynskhem ïa ka kam jong u nongaplai hadien ba la pynpaw ba ka kyndon ba treikam ka dei ka daw jong ka jingpyndam noh ïa ka jingpynlong ryntih ïa ka jingshakri jong u nongaplai, ym shym la thoh eiei kaba kyrpang ban pyni ba kano ka bynta kyrpang jong ka kyndon ba treikam ym shym la bud katba dang pynlong ryntih ïa ka jingshakri jong u nongaplai,” la ong ka hukum.
Ha ka 3 tarik jylliew, u CEM ka KHADC Bah Shemborlang Rynjah u la pyntip ba ka EC ka la wengkam ïa ki 13 ngut kiba la thung thymmai bad la pyndam noh ïa ka jingpynskhem kam jong ki 30 ngut ki nongtrei Casual hadien ba la thung ïa ki khlem kano kano ka kam ba la mang.
