Hap ka liengsuiñ Air India ba kit 242 ngut ki briew hajan Ahmedabad Airport, bun kiba la artatien ban dang im

Ahmedabad, Jylliew, 12 : Ka liengsuin Air India kaba mih na Ahmedabad ban leit sha London ryngkat ki 242 ngut ki nongleit jingleit ka la hap bad bthei hajan ka medical college complex tang khyndiat minit ba ka mih na kad liengsuin ha kane ka sngi Palei.
Tad haduh ba thoh ïa kane ka khubor ym pat ïoh jingtip ban pyntikna katno ngut kiba lait im bad katno ngut pat kiba kylla long ki lanot.
Wat hadien bun kynta ba katei ka liengsuin Boeing 787 Dreamliner (AI171) ka la hap bad bthei hajan ka civil hospital bad BJ Medical College kaba don hajan Sardar Vallabhai Patel International Airport, hynrei ym pat tip satia pat katno ngut kiba la khlad watla ka la don ka jingartatien ïa kiba bun ba kin lait im na katei ka jingbthei kaba jur.
Na ka liang ki kynhun pyllait im ki la pynstet ban wad ïa kiba lait im ha katei ka liengsuin kaba la jan ingkhong, hynrei haba ki ïoh ban sei bun kiba la ingding bad jur ka jingmynsaw.
Katkum ka jingong jong ka Air India na ki 230 ngut ki nongleit jingleit, 169 ngut ki dei ki nong India, 53 ngut ki nong Bilat, 7 ngut ki nong Portugal bad iwei i nong Canada. Ki 12 ngut kiwei pat ki kynthup ïa ki pilot bad ki nongpynïaid ha katei ka liengsuin.
La ong ba khyndiat minit hadien ba kane ka liengsuin ka la mih na ka kad liengsuin ha ka por 1:39 baje mynsngi na ka liang u pilot u la ai dak lypa, ong ka Air Traffic Control ha Ahmedabad.
Shuh shuh la ong ba kane ka liengsuin ka la poi haduh 600 – 800 phut sha suin ha shwa ba kan hiar arsut bad hap sha madan.
Halor kane ka jingjia, u heh BJP na Gujarat ba dei ruh u Myntri Rangbah ba rim u Vijay Rupani u la dei uwei na ki nongleit jingleit ha katei ka liengsuin.
Hadien kane, hadien ba ki kynhun pyllait im ki la poi mardor la sei ïa ki briew na katei ka liengsuin bad la pynkit mardor sha ka jaka sumar kaba don hajan.
Na ka liang u Myntri Rangbahduh ka Ri u Narendra Modi u la ong, “Kane ka jingjia ba sngewsih ha Ahmedabad ka la pynkyndit bad pynsngewsih ïangi. Ka long ka jingjia kaba kthang haduh katta katta. Ha kum kane ka por ka jingsngewsih nga donlang bad baroh kiba mad ïa kane ka jingsngewsih. Nga la dep ruh ban kren ïa ki Myntri bad ki bor sorkar kiba dang pyrshang ban ai ïa ki jingïarap sha kito kiba shah ktah,” u la pynpaw ha ki rynsan social media.
Ha kajuh ka por ka President Droupadi Murmu ka la phah lang ka khubor sngewlem sha kiba la mad ha katei ka jingjïa ba sngewsih.
Ha kajuh ka por u Syiem Charles III jong ka Bilat u la ong ba ma u bad ka kurim jong u ka Syiem Camilla ki la dap da ka jingkyndit kaba khraw ban ïohi ïa kane ka khubor.