Shillong, Jylliew 12 : Ki arngut ki MLA na Ri Bhoi District ba kynthup ïa u MLA ka Nongpoh Bah Mayralborn Syiem ryngkat u MLA ka Mawhati, Bah Charles Marngar ryngkat lang bad ki nongïalam shnong jong ki 22 tylli ki shnong na ka thain Syntumaw bad Umdohkha ki la kynduh ïa u Symbud Myntri Rangbah ka jylla, Bah Prestone Tynsong ban pan da ka surok kali kaban pynïasoh ïa kitei ki ar tylli ki shnong kiba don mar shilliang jong ka Mawhati bad Nongpoh constituency.
Ha kane ka jingkynduh, kine ki MLA ki la ïathuh ba ki la dep ban pynpaw ha u Symbud Myntri Rangbah ban pynïoh noh da ka surok kaba thymmai kaban poi kumba 10 kilometer ei ei hapdng ka Syntumaw bad Umdohkha khnang ba ki paidbah kin ym mad jingeh shuh ha ka leit ka wan bad kin ym donkam shuh ban ïaid kyllain ïa ka surok kaba jngai ban poi sha ki kam ki jam jong ki.
Katkum ka dorkhas ba la phah sha u Symbud Myntri Rangbah ha ka kyrteng jong ka Joint Action Committee, ki la kyrpad ruh ban shna ïa ka jingkieng hapdeng ka wah Umsiang kaba don ha Pahamdingan.
Na ka liang u Bah Mayral bad Bah Charles haba kren bad ki lad pathai khubor, ki la pynpaw ba ka jingkynduh ka long kaba seisoh naba u Symbud Myntri Rangbah u la ai ïa ka khubor kaba don jingkyrmen.
“Kane ka surok ka long kaba donkam haduh katta na ka bynta ka jingmyntoi jong ki paidbah ka thain bad ngi sngewkmen haduh katta katta ba i Symbud Myntri Rangbah ba i la ai ka jingkyrmen ban pynrung ïa kane ha ka skim . Manga bad Bah Charles ngin sa buddien ïa kane ka kam khnang ba lah pynrung ïa ka ha ka PMGSY – 4,” ong u Bah Mayral.
Katba na ka liang u Bah Charles pat u la ong ba um don eiei ban ong hynrei tang ban pynpaw ïa ka jingsngewnguh ïa ka sorkar jylla kaba la shimkhia bad pynurlong bun tylli ki projek surok ha ka thain bad ha jylla hi baroh kawei.
