SHILLONG, Jylliew 12: Ka phutbol India ka la mad bad sakhi ïa ka kyrdan kaba poh tam ha kaba ka kynhun ïalehkai jong ki kynthei ka la hiar shaduh ka kyrdan kaba 70 ha ka thup kyrdan ba thymmai ba la pynbna da ka FIFA, kaba la pyllait da katei ka synjuk phutbol ba ha khlieh duh ha ka sngi Palei.
Ka Blue Tigresses (Indian Women’s Team) ka la shah rem lynter ha ki jingïakhun pyrshah ïa ka Uzbekistan ha u bnai Jymmang-Jylliew, kaba la pynlong ïa ka kynhun ban shah khate 9.93 poiñ bad ka la hiar shi kawei kyrdan ha ka FIFA Rangking.
Ka kyrdan kaba bha tam jong ka kynhun ïalehkai phutbol ki kynthei jong ka India ka dang long ka kyrdan kaba 49 ba ka la ïoh ha u bnai Nailar 2013. Watla ka dang sah ha ka kyrdan kaba 50 haduh u bnai Nailar 2022, hynrei naduh katei ka por ka kynhun ka la mad ïa ka jinghiar kaba stet bha.
Kane ka jingpynbna kaba thymmai ka la nang pynkhraw shuh ïa ka jinghiar ha ka phutbol India, ha kaba la sakhi ruh ïa ka kynhun jong ki shynrang kaba la shah rem ha ka ri kaba kham poh kyrdan, ka Hong Kong ar sngi mynshwa, kaba la nang buh jingeh shuh shuh ban ïohrung sha ka AFC Asian Cup ka ban wan.
