Ka Sonam ka la dep byrngem lypa ha ka kmie ba kan leh ei ei ïa u Raja hadien ba la dep ïathoh

Shillong, Jylliew 11 : Ka Sonam Raghuvanshi kala byrngem lypa ïa ki bahaïing hasem ba pynïathoh jubor ïa ka bad u Raja Raghuvanshi da kaba ong “Ngan ïathoh ïa u Raja Raghuvanshi hynrei sa peit ngan leh aiu ïa u”.
Ka Sonam kala don jingïadei bad u Raj Kushwaha, uba trei kum u Accountant ha ka kompani plywood u kpa ka Sonam, hynrei la ïathuh ba ka Kmie bad u Kpa kim sngew tynnad satia namar u Raj u wan na ka jait ba poh katba ka Sonam na ka jait bakraw ba tri.
ïa kane la pyntip da u hynmen u Raja, u Vipin Raghuvanshi uba la ïathuh ba ka Sonam kala dep pyntip ïala ka kmie ba ka don jingiadei bad u Raj hynrei ka Kmie kala pyrshah jur.
Ka Sonam kala byrngem ïa ki bahaïing ba kan mih kaei kaei ka bym sngewtynnad lada pynbor ïa ka ba kan ïathoh bad u Raja Raghuvanshi, uba la shah pyniap tang khyndiat sngi hadien ka jingïakyntiew kurim bad kane ka briew, ong ki Pulit.
U Vipin ula ïathuh ba ka Sonam kala dep pyntip ïa ka Kmie ba ka don jingïadei bad u Raj. Ka ong ba kam kwah ban ïathoh bad u Raja. Hynrei ka Kmie,kala pyrshah ïa kane ka jingïadei bad u Raj bad kala pynbor ïa ka ban ïathoh” ong ka khubor.
U Vipin ula kynnoh ba ka Sonam kala mynjur ban ïapein bad ban ïathoh ïa u Raja hynrei kala maham lypa ba kan sa mih kaei kaei ka bym sngewtynnad. Ka ong ‘phin sa ïohi ïa kaei kaba ngan leh ïa une u briew. Phin hap ban mad ïa ki jingsngewsih baroh’. Ym don ba poi pyrkhat ba kan pyniap ïa u Raja” la bynrap.
U Vipin ula kynnoh ruh ba ka Sonam kala ïasah ha kawei ka hotel bad u Raj hadien ka jingpyniap ïa u Raja. Hadien kane, ula phah ïa ka ba kan leit shala ka jong ka Shnong ha Indore, Madhya Pradesh, bad hangne kala sah arsngi.
Nangne pat kala mih bad kala leit sha Ghazipur bad dei da ka jingïohkem ki Pulit ïa u Raj bad ïa ki 3 ngut ki nongpyniap, ka Sonam kala mih pyrthei bad aiti ïalade sha ka Aiñ ha Nandganj Police Station, Ghazipur District, Uttar Pradesh.
Ka khubor Pulit ka ïathuh ba ka Sonam kala thong haduh T.20 lak ban pyniap ïa u Raja. Ka khubor ka ïathuh ba kine ki nongpyniap kila ïakynduh nyngkong eh ïa kine ki shijur ba dang shu dep ïathoh ha Bengaluru bad nangne kila wan da ka liengsuiñ sha ka thaiñ Shatei Lam Mihngi.