44 lak na ka mang tyngka, ïoh ïing skul thymmai ka Nongbah-Rangblang Govt LPS

Mawkyrwat, Jylliew 10: Kum shibynta ban pyntyllun ïa ka kam lyngba ka jingai jinghikai ïa ki khynnah ha ka liang ka pule puthi, u MLA ka Mawkyrwat Constituency Bah Renikton Lyngdoh Tongkhar ha ka sngi Baar u la plie paidbah ïa ka ïing skul ba thymmai jong ka Nongbah-Rangblang Government Lower Primary School ha shnong Nongbah-Rangblang, South West Khasi Hills District.
ïa kane ka ïing skul ba thymmai la tei ha ka jingmang pisa kaba T. 44 lak tam hapoh ka School Infrastructure Upgradation Project lyngba ka Phase – II ba la bei pisa na ka Sorkar Meghalaya.
U Bah Renikton haba kren ha ka jingïalang u la pynpaw ka jingsngewnguh ïa ka sorkar kaba la shimkhia ban leh ei ei na ka bynta ki skul jong ka sorkar namar hadien ba ka la ïohi ba ki don ki ïing skul kiba la sdang ban jot bad mynta pat ki la ïoh da ki ïing kiba thymmai ha kaba da ka jingïoh ïa kum kine ki jingtei kan long ka jingïarap na ka bynta ki nonghikai bad khamtam eh ïa ki khynnah skul ba ki ïoh ban wan sha ki jaka pule ba lait na u slap bad ka lyer.
Haba kren ha kaba ïa dei bad ka jingkiew jinghiar jong ka pule puthi ha ka Jylla Meghalaya, u bah Renikton u la kubur ba ka dei ka jingshisha namar ba kiba bun ki skul sorkar ki don ki jingduna kiba bun haba ïa nujor bad ki skul shimet ne ki skul ba la pynïaid da ki Balang. “Ki skul sorkar ki kham duna ki jingtei ba don teng teng ki jot ki pra haba ïa nujor bad ki skul shimet”, long u bah Renik. Kumta khnang ba ki skul sorkar kin bit kin biang ka sorkar lyngba ka tnad pule puthi kam shym la duh mynsiem hynrei ka ïaleh katba lah ban pynbiang ïa ki jingdonkam la ka long ïa ki jingtei bad kiwei de ki jingdonkam.
U la kyntu ba haba ki la ïoh ïa kane ka jingtei kaba thymmai kum ka shnong, ki nonghikai lem bad ki khynnah skul ki dei ban sumar kum la ka jong khnang ba ka jingtei kan neh itynnad bad ba ka pule puthi ruh ha kane ka shnong kan kiew bad ba ki khynnah ruh kin nangroi na uwei u snem sha uwei pat.
Ha kane ka sngi na ka liang jong u babu S. Lyngkhoi uba dei u nonghikai u la pynsngew ha ka jingkren jong uba kum ka skul ka donkam ïa ka madan jong ka skul, ki jaka leit shabar, ka ïing shet ja bad kumjuh ruh ki jingker ne fencing.
Kiba la ïa donlang ki long u bah D.G. Nongsiej, District School Education Officer bad Incharge Sub Divisional School Education Officer, South West Khasi Hills District, ki nonghikai, ki khynnah skul lem bad ki paidbah jong ka Shnong Nongbah-Rangblang.