Ba sei pyrthei ïa ka jingshah pynïap u Raja, ai jingïaroh u DyCM ïa ka tnad Pulit

Shillong, Jylliew 09 : U Symbud Myntri Rangbah ka Jylla ba peit ïa ka tnad Urban Affairs, Bah Sniawbhalang Dhar u la ai ka jingïaroh ïa ki pulit ka jylla kiba la lah ban sei pyrthei bad thad madan halor ka jingshah pynïap u Raja Raghuvanshi na Indore, Madhya Pradesh ha ka por ba u wan kai lang bad ka kurim dang shen sha Sohra.
U Symbud Myntri Rangbah u la ong ruh ba ki pulit ka Jylla ki dei hok ban ïoh ïa ka jingïaroh hadien ba ki la lah ban thwet bad ruh haduh ban da ïoh kem ïa kiba suba donkti ha katei ka kam bymman.
“Nga kwah ban ai ka jingkhublei ïa ka tnad Kampohiing ka jylla naba ki la leh shisha ïa ka kam kaba khraw haduh katta katta ban ïoh kem ïa kiba donkti ha kane ka kam. Nga kwah ruh ban ai khublei ïa ki paidbah ka thain kiba la ai ka kti kamon ka kti kadiang ban ïarap ïa ki pulit, NDRF, SDRF ha ka por ba dang pynlong ka jingwad paidbah. Ka jingïaroh ka dei eh ïa ka tnad pulit kaba la ïoh ban kem ïa ki runar ba donkti ha kane ka jingjia,” u la ong.
Ha kawei pat ka liang, u Symbud Myntri Rangbah u la ong ba ka sorkar kan sa shim da ka lynti kaba tyngeh pyrshah ïa kito kiba donkti ban pynjah burom ïa ka Meghalaya da kaba shu kynthoh khlem don nongrim.