Nongstoiñ, Jylliew 21: Da ki spah ngut ki nongkyrshan na ka seng Congress, HSPDP bad na kiwei kiwei ki party kiba hap hapoh ka thaiñ Shilliang Wahblei jong ka Mawshynrut Constituency, ki la wan ban pynïasoh noh ïalade sha ka Party NPP ha ka 18 tarik, ha kaba u MLA ka thaiñ u Bah Gigur Myrthong, ha ryngkat ka jingïadonlang ki nongïalam ka NPP Mawshynrut, ki la ïoh ban pdiang burom ïa kitei ki nongkyrshan ba thymmai jong ka Party.
Ha katei ka sngi ka Party NPP ka la ïoh ban pdiang burom ruh ïa u Bah Phelington Nongphud, General Secretary ka HSPDP Youth Wing ha ryngkat ki dkhot bad nongïalam katei ka Party na thaiñ Shilliang Wahblei. Kumjuh ruh ïa u Bah Edius Thongni nongïalam na ka Party Congress bad ki paralok jong u, ha ryngkat bad kiwei pat ki nongkyrshan kiba la wan ban pynïasoh thymmai sha katei ka Party, na ka bynta ban wan ai jingkyrshan ïa u Bah Gigur Myrthong ha kane ka election MLA ban wan.
Haba ai jingkren ha katei ka sngi, na ka liang u Bah Edius Thongni nongïalam barim ka party Congress, u la ong ba kam don kano kano ka daw ïa u ban mih noh na ka Congress, hynrei ka dei namar kim don shuh ïa ki nongïalam hapoh ka constituency. U la ong ba hadien ba u la mih na ka seng Congress, u la rai ban ai jingkyrshan noh ïa u MLA ba mynta u Bah Gigur Myrthong, namar ba u ïohi shisha ïa ki kam radbah kiba u la leh na ka bynta ka dong ka thaiñ bad kumjuh ruh ka jingïarap ïa kiba duk ba suk.
Na ka liang u Bah Phelington Nongphud, General Secretary barim ka HSPDP youth wing, u la ong ba ki don shibun kiwei pat ki dkhot na ka party HSPDP ki ban sa wan ban pynïasoh noh sha ka party NPP bad ïa ka jingpdiang burom ïa ki yn sa leh ha ki shnong ki shnong. U la kyntu ruh ïa ki paidbah ba kin ïalong tylli kawei na ka bynta ban wanrah ïa ki jingkylla ha ka dong ka thaiñ.
Katba na ka liang u Bah Gigur Myrthong MLA ka Mawshynrut, u la ong ba ha kine ki saw snem tam ba u la ïoh long MLA, u la pyrshang la I buit I bor ban pynïoh ki jingïarap sha ki shnong ki thaw bad sha ki paidbah ka dong ka thaiñ, hynrei um lah ban leh lut ïa kine tang hapoh ka san snem.
U la ong ba u dei u briew u ba la ju im ban bam da u phandieng ha ki por ba mynshwa, namar kata u tip bha ïa ka jingeh ba ki nongkyndong ki mad bad ym kum kiwei pat kiba la im ha sor, ki bym sngewthuh shuh ne tip ïa ka jingeh ba ki paidbah ha nongkyndong ki mad.
U la ïathuh ruh ba ha kaba ïadei bad ka MLA scheme, u la ïoh ban sam lut baroh khoit bad u la phiah ïa kane sha ki shnong ki thaw, ki kynhun bad ki riew shimet hynrei u la ong pat ba ka MLA scheme kaba u ïoh, kam lah ban pyndap lut sha baroh hynrei u la thaw ki lad ki lynti ban wanrah ïa ki scheme bapher bapher ha ka dong ka thaiñ kum ki surok, ki lynti ki synkieng, ki jaka pule dangle, ki jaka sumar bad kiwei kiwei ki kam pynroi ha ka dong ka thaiñ.
Ha katei ka sngi la ïoh ruh ka jingkren na u Bah H.L Nongsiang, Chief Adviser ka party NPP Mawshynrut, u bah Morningstar Mawsor, MDC barim ka Mawshynrut, ki nongïalam Party na Shilliang Wahblei bad na Mawshynrut bad kiwei kiwei.
