Ba ther u lapbah bajur julor ki tin tap ïing bad jingkieng ha Hot Spring ha Umjaraiñ

Mawkyrwat, Jymmang 21: Hadien ka jingwan jong u slap u ba jur ha ka 16 tarik u Jylliew, 2022 ka la pynlong ïa ki wah bah ne ki wah rit ba kin kiew ha ka jingdon jong ka um ha kaba la tyllep lut ïa kiei kiei kiba don hajan jong ka wah.
Halor kane ka jingshah tyllep jong ka um saw ka la jia mynta ïa kawei na ki jaka jngohkai ne jaka wan sum pyngngad ki paidbah ha kaba ki tin tap ïa ki jaka sum, ki jingker jong ka jingkieng bad ki jingsiang ha madan ki la shah pynjulor lut.
Lah ban kdew ba ha kane ka jaka kiba ju wan kai pyngngad ne wan sum ki dei na ki shnong kiba marjan kiba dei napoh jong ka South West Khasi Hills District ne kiba nabar jong la distrik bad kiba nabar ka jylla ruh.
Ka jingmang na kaba shah pynjot ha ki bor jong ka mariang ïa kane ka jaka jngohkai la antad ba ka poi haduh T. 40/- lak ei ei bad da ka jingshah pynjot kumne ka la long ka jingduh nong kaba khraw na ka bynta ki nongpynïaid bad kumjuh ruh ïa kiba ju mlien ban wan kai pyngngad ha kine ki jaka.
Namarkata, na ka liang ki nongpynïaid ruh ki la ai jingtip sha baroh ki paidbah kiba ju wan kai sha kane ka jaka ba ïa mynta shipor la lap ban khnang shwa ïa ka namar kam long shuh ban pyndonkam ha kaba la hap ban shna ne repair pynbha shwa tat haduh ba ynsa pyntip da kumwei pat.