Nongpoh, Jylliew 21: Ban ïa snoh kti lang ha shi tyllup ka pyrthei, ka BJP Nongpoh Mandal ha Ri Bhoi mynta ka sngi ka la mih shakhmat ban rakhe ïa kata ka International Yoga Day, kaba long shi bynta ban pynshlur ïa ki paidbah ba ka jingïalehkai Yoga ka dei kawei na ka jingïalehkai kaba ai jingmyntoi bad kaba lah ruh ban ai ïa ka jingkoit ka jingkhiah.
Ïa akne ka jingrakhe ïa ka International Yoga Dal la pynlong ha Gladden Tower Hall, Nongpoh, ha kaba da ki spah ngut ki samla ki la wan ban shim bynta ban kyllan met kakum ki kyndon ïalehkai Yoga.
Ha kane ka sngi nalor ki samla kiba la shim bynta, la don ryngkat ka Kong Marian Maring, u Paralad Toor, u Bah Lucas Maring bad kiwei kiwei ki nongïalam ka BJP Nongpoh Mandal.
Lyngba jong kane ka sngi la sam ruh sha kito kiba wan shim bynta ha kane ka jingrakhe ïa ka International Yoga Day da ki Yoga day T-shirt bad la sam ruh ïa ki khusnam sha kito kiba jop kiba wan ha ka kyrdan ba nyngkong haduh ka kyrdan balai.
Na ka liang ka Kong Marian Maring, haba kren ha kane ka sngi ka la ai mynsiem ïa ki khun samla ba kin shlur ban ïalehkai ïa ka jingïalehkai Yoga, namar kane ka jingïalehkai ka dei kawei na kaba ai jingkoit jingkhiah bad kumjuh ruh ba bun ki samla kin lait na ki jingdih ba sniew ne ki kam sniew lada ki pynleit por ha kum kine ki jingïalehkai kiba dei shi bynta ka jingïalehkai sport ba kin kyllan met na ka bynta ka koit ka khiah jongki.Caption: Ki longkmie bad nongïalam shnong kiba la wan ban shim bynta haka International Yoga Day ha Bhoirymbong.
