Shillong, Jylliew 07: Ka Khasi Students Union (KSU) ka la rakhe ïa ka sngi pynneh mariang da kaba thung palat 2000 tylli ki tynrai dieng ha kylleng ki lum Khasi da ki dkhot ka seng bad ki khynnah skul ha ki jaka bapher bapher.
Katkum ka kyrwoh la ong ba kum shi bynta ban ïai pynneh pynsah ïa ka mei mariang shi tyllup ka pyrthei ka KSU lyngba ki tnat treikam ka la pyndep ïa la ki jong ki bynta ban pynjyrngam bad pynphyrnai ïa ki Sawdong Sawkun ha man la ki jaka ha kylleng Sawdong ka Bri Hynñiewtrep.
Ki shnat treikam jong ka KSU kiba la ïashim bynta ha ka sngi pynneh mariang ki long ha KSU East Jaiñtia Hills District Unit ka lah ïoh thung dieng 200 tylli ha ryngkat ki khynnah skul ka Synod Mihngi Presbyterian ha ka Shnong Thangskai. Ka KSU South West Khasi Hills District ka la ïoh ban rakhe ïa ka World Environment Day da kaba pynkhuid ïa ka wah Mawpon bad ki sawdong sawkun ka jong ka da kaba pynkhuid ïa ki plastic halor ka phang pdeng jong kane ka snem rakhe ïa ka World Environment Day ha ryngkat ka jingïatrei lang bad ka Seng Samla Mawkyrwat bad ka Mawkyrwat Fishery Association.
Ka KSU West Jaiñtia Hills District Unit ka lah ïoh ban thung dieng kumba 185 tylli ha ki jaka bapher bapher kynthup ïa kine ki jaka, ha Ïooksi Presbyterian Hr Secondary school, Ïooksi Veterinary dispensary, Ïooksi PHC, Auxilium Secondary School Saphai Meghalaya Fire bad Emergency service Saphai station, Saphai Police out post.
Ka KSU West Khasi Hills District Unit ka la ïoh ban thung kumba 250 tylli ki dieng, KSU Mawkhar Circle 10 tylli ki dieng hapoh ka jingïalam jong u samla Aeron Vincent Jyrwa uba long u Environment Secretary bad samla Phrang Iawim ha ryngkat bad ki dkhot ka Mawkhar Circle, ka la thung da ki dieng ha Lawmali. Ka kyrwoh ka long ban wanrah ïa ka lyer ba khuid ban pynneh pynsah ïa ka mei mariang bad ban pynneh ïa ka jingjyrngam ba itynnad.
Ka KSU Upper Shillong Circle -ka la thung 40 tylli ki dieng, ka KSU Laitjem, Sadew bad Mawkriah Unit, ryngkat ki dkhot ka Circle ki lah ïoh ban ai bad thung ïa 40 tynrai ki dieng ha ki jaka kylleng ka thaiñ bad kumjuh ha ka Sadew-Mawkriah Presbyterian Secondary School ha ka jingdonlang ki khynnah skul kumjuh bad ki Nonghikai. Ka seng ka lah shim ïa kane ka sienjam kum shi bynta ban ai burom bad ban pynneh pynsah ïa ka mei mariang ka ri Khasi. Ka Maitshaphrang Laitjem, Sadew bad Mawkriah Unit.
Ka KSU Mawlai Circle 25 tylli ki dieng ha ka sngi rakhe pynneh mariang ha ka skul Umjathang LP & UP School Mawsiatkhnam da kaba lum bad lang ïa ki plastik bad ban thung ïa ki dieng hapoh phyllaw jong kane ka skul.
Lah ïoh ruh ban pynlong ïa ka jingïalang ba lyngkot bad lah pynïaid da u Samla Ozzy Kurbah Assistant Environment Secretary bad lah ïoh ruh ka jingkren na ka Principal ka skul Bah S. Kharbuki, na u Samla Wellborn Nonglang (Environment Secretary) bad na u Samla Eddie Malngiang General Secretary bad lah sakhi lang da ki nonghikai bad ki khynnah jong kane ka skul.
Ka KSU NEHU Unit 40 tylli ki dieng ki lah ïoh ban thung hapoh skulbah NEHU. Ka KSU North Khasi Hill District Unit ki lah ïoh ban thung dieng kumba 1500 tylli ha ki Dong bapher, bapher. Kane ka long katkum ka kyrwoh na u Samla Shiningstar Kharbihkhiew Environment Secretary KSU.
