Sakhi lang u DSEO-EJHD ïa ka jingpynlong ka tnat CSR jong ka Star Cement ïa ka Test-Star Merit Scholarship Award 2022-2023

Khliehriat Jylliew 21:Kum shibynta ban ïarap ban kyntiew ïa ka stad ka tip ha ka thaiñ, ka tnat treikam C.S.R jong ka company dewbilat ka Star Cement Lumshnong mynta ka sngi ka la pynlong ïa ka exam (test) ïa baroh ki khynnah pule kiba na East Jaiñtia Hills District, kiba pule ha ka kyrdan ba khatar (12th standard), ïa kane ka test la pynlong ha Star Public School Lumshnong ba la wan ruh ban sakhi lang da u Joint Director of school Education & Literacy, Jowai, u ba bat ruh kum u Incharge District School Education Officer., East Jaiñtia Hills District, u bah Luckystar Lyngdoh.
Ki la don haduh 240 ngut ki khynnah skul na ki khatwei tylli ki skul kina na East Jaiñtia Hills District kiba la wan ban ïa tynjuh ha kane ka Star Merit Scholarship Award 2022-2023.
Ka CSR ka la dep pynshai ruh ba ki shi phew ngut ki khynnah kiba pass bha ki ban rung ha ka thup ba nyngkong kin ioh ïa ka jingpynkup burom lem bad scholarship kaba mar T 50000 (san phew hajar) tyngka, ki ar hew ngut ki khynnah kiban rung ha ka thup kaba ar (2nd 20 students) kin ioh ïa ka scholarship kaba mar T 30000 (lai phew hajar) tyngka bad ki ar phew ngut (3rd 20 students) ki ban rung ha ka thup kaba lai kin ioh ïa ka scholarship kaba mar T 15000 (khatsan hajar) tyngka marwei.
La ong ba kane ka jingai scholarship ka CSR jong ka tar Cement Company ka long kum ka jingpynshlur ïa ki khynnah ba kin kiew shaphrang ha ka jingnag jingstad bad ban kiew sha duh ki kyrdan kiba kham shalor.
Ha kaba iakren bad u Joint Director of school Education & Literacy, Jowai, u la ai ka jingiaroh ïa ka tnat CSR jong ka Star Cement kaba la pynlong ïa kum kane ka Exam kaba long kawei na ki lad ban pynshlur ïa ki khynnah, khamtam ki don ruh ki kyndon ba la pynshai ba kito ki khynnah kiba pule ha ki higher Secondary School kiba don ha EJHD ka long kum ka jingai mynsiem, khnang ba kin kham ïaleh ban trei shitom ban minot ban ioh ban kheit ïa u soh ka jingjop, u la pynpaw ruh ka jingsngew kmen halor kawei ruh ka mat kaba ong ba kane ka long ruh kum ka jingkyrshan lem ia ki khynnah ba kin dup lah ban pyndep sha khmat ïa ki jingpule jong ki
U Manager CSR, Star Cement Lumshnong, u Kingshok Borah, u la ong ba kane ka khusnam ka long kum ka jingpynshlur ïa ki khynnah ba kin long kiba trei shitom ha ki jingpule ban kiew shaphrang bad ha kajuh ka por ka long ruh kum ka lad ban ïarap ban kyrshan lem ha ki jingpule jong ki.
Ki khynnah skul ruh kiba la wan ban ïa shim bynta ha kane ka Exam mynta ka sngi, ki la ai ka jingkhublei ïa ka Star Cement kaba la pynlong kum kane ka Test ka ba long ruh kum ka jingai jinghikai ïa ki ban long shlur (confident) ban iakhun ha kino kino ki exam jong ki ha ki por ki ban sa wan