Khliehriat, Jylliew, 6: U Symbud Myntri Rangbah ka jylla Bah Sñiawbhalang Dhar uba dei u Chairman jong ka Regional Committee na ka bynta ka Jaiñtia Hills u la khlei ia ka jubanlak ba ka shnong Baikam kan hap beit sha u pud u sam jong ka Jylla Meghalaya ha ka jingiapynbeit pud ha ka wat kaba ar hapdeng ka Sorkar Meghalaya bad ka Sorkar Assam.
Ha ka jingiakren bad ki lad pathai khubor ha Khliehriat, East Jaiñtia Hills District hadien ba la wai ka jingialang ha ophis u Deputy Commissioner, u Bah Dhar u la iathuh ba ka jingiakren ha ka jingialang ka long halor ka mat kaba ïadei bad ka shnong Baikam kaba don sha jylla Assam.
“Ka dang don ka lad haduh 99 percent ban wanrah biang ïa ka shnong Baikam shapoh ka jylla Meghalaya kumba ki nongshong shnong ruh ki kwah ïa kata,” u la ong.
Ka shnong Baikam ka dei ka shnong ba la shong la sah da ki jaitbynriew Khasi Pnar kiba im da ka rep ka riang. Hadien ka jingleh ia ka jingsorjamin da ka Sorkar Pdeng ha u snem 2022-2023 bad hadien ka jingïasoi ia ka Memorandum of Understanding (MoU) hapdeng ka Sorkar Meghalaya bad ka Sorkar Assam la shem ba ka shnong Baikam kam shym la hap hapoh ka jylla Meghalaya hynrei ka hap noh hapoh ka jingkhmih jong ka Sorkar Assam.
Hadien kane, ki nongshong shnong jong ka shnong Baikam naduh u snem 2023 ki la phah da ka jingthoh sha ka Sorkar Meghalaya ban pynpaw ba ki thrang bad ki angnud ba ka shnong Baikam kan hap noh hapoh ka jingkhmih jong ka Sorkar Meghalaya.
U Bah Dhar u la ong ba ïa kane ka kam yn sa pyndep noh kham kloi bad u la kubur ruh ïa ka jingshisha ba ki nongshong shnong jong ka shnong Baikam ruh ki kwah ban don noh hapoh u pud u sam jong ka jylla Meghalaya.
U la iathuh ruh ba ki don haduh 37 ki longïing ha ka shnong Baikam bad 30 tylli ki longïing ki kwah ban don noh bad ka jylla Meghalaya.
“Ym ju don ba iathuh ïa nga shaphang ka shnong Baikam hynrei dei hadien ba ladep ïasoi ia ka MoU la lap ba ka shnong Baikam kam shym la rung hapoh u pud u sam jong ka jylla Meghalaya bad dei hangta ba ki nongshong shnong ki la wan ban ai da ka jingthoh ba ngan sa tip shaphang ka shnong Baikam bad ki la kyrpad ruh ban pynrung noh hapoh ka jylla Meghalaya,” la ong u Symbud Myntri Rangbah.
Katkum ka jingiathuh jong u Bah Dhar, ki nongshong shnong jong ka shnong Baikam ki ioh ki jingmyntoi khyndiat na ka Sorkar Assam bad ki ju ioh ruh ki jingiarap ne jingmyntoi wat na ka sorkar Meghalaya nalor ba ki im suk, im saiñ ha kaba ym ju don kano kano ka jingwit ne shah pyndik ha ka Assam bad bynrap ruh ba ka shnong Baikam.
U la kular ba ïa ka jingïapynbeit pud yn sa ialeh ban pyndep noh kham kloi bad hadien ba ladep ban shim ïa ka rai lyngba ki kaiphod yn sa lah ban buddien kham bha shuh shuh ha kaba ïadei bad ki lad ai jingiarap ïa ki nongshong shnong.
U Deputy Commissioner ka East Jaiñtia Hills District Shivansh Awasthi, u la ong namarba ïa mynta hi kane ka kam ïapynbeit pud kam pat shai na kata ka daw la khot ïa kane ka jingïalang lem bad ki nongshong shnong na ka shnong Baikam.
“Ynda ka kam ka la shai bad ynda la lah ban pynbeit ïa ki kam baroh yn sa lah ban theh shuh shuh ïa ki jingiarap ïa ki nongshong shnong,’ u la bynrap.
“Ka la don ka jingiakynduh lang hapdeng u DC ka East Jaiñtia Hills District bad u DC na Cashar District bad la iakren ruh halor kane ka phang kaba ïadei bad ka shnong Baikam bad la rai ba na ka liang ka Assam kan sa phah ïa ki kaiphod halor kane bad shen hadien khyndiat sngi yn sa pynlong biang ïa ka jingialang bad u DC na Cachar bad hadien kane ngin sa lah ban phah ïa ka kaiphod ha kaba ïadei bad kane ka shnong ha khappud,” la pyntip u Awasthi.
U Awasthi u la ong ruh ba ka jingialang ka dang sateng mynta bad hadien khyndiat sngi yn sa shong jingialang biang bad hangta yn sa phah ruh ïa ki kaiphot na ka liang ka Assam bad na ka liang ka Meghalaya ha kaba iadei bad kane ka jingïa pynbeit pud hapdeng ka Assam bad ka Meghalaya ha shnong Baikam.
Ki nongshong shnong jong ka shnong Baikam kiba la wan poi ha ka jingialang ha ophis u Deputy Commissioner ha Khliehriat, ki la pynpaw ïa ka jingthrang bad angnud ban don noh hapoh ka jylla Meghalaya bad ki la pynpaw ruh ba ki kwah ban don ryngkat lang bad ki paradoh parasnam la jong kiba dei ki Khasi Pnar.
Ha ka jingialang la don lang ruh u Superintendent of Police ka East Jaiñtia Hills District u Giri Prasad, u Doloi ka Elaka Narpuh Bah Manbha Kyndoh,u Sub-Divisional Officer (Sardar), East Jaiñtia Hills District M. Kumar, u Additional Superintendent of Police East Jaiñtia Hills District Bah S. Pasleiñ, u Block Development Officer Wapung C&RD Block Bah M. Kyndait bad bad kiwei kiwei ki heh sorkar.
