Mairang, Jylliew 05: Ha kaba ïadei bad ka jingsdang jong ka aiom slap kaba lah ban wanrah ïa jingther u lapbah, ka jingshlei ki wah, na ka liang ka Deputy Commissioner ka la bthah ïa ki nongshong shnong ba ki dei ban bud ïa ki jingbthah ban lait na kino kino ki jingjia ba sngewsih.
La kyntu ïa kito kiba sah harud ki wah ba ki dei ban long husiar khamtam ha ka por mynmiet. Kito kiba sah ha ki jaka ba don jingma ki dei ban kynriah noh sha ki jaka ba kham shngaiñ. La kyntu ban kiar ban jam sha ki wahduid, ki wahbah bad ki kshaid ha ka por ba jur slap. Ka jingjur slap ka lah ban wanrah ïa ka jingtwa khyndew ha ki surok shnong ne surok bah kumta ki briew ki dei ban husiar ha ka leit ka wan khamtam mynmiet.
La kyrpad ïa ki paidbah ban ym mih shabar ïing ha ka por ba jur u slap ryngkat u pyrthat ne ka leilieh, ne ban wad jaka rieh lada jia ba hap phria. Dei ban pynlip ïa ki tiar electricity kum ki mobile, istiri, TV bad ka bording electric. Ym dei ban ñiah kali stet ne ban ñiah ha ki jaka ba shlei um bad kiar ruh na ki electricity post ne sainar light ban ïada na kano kano ka jingmynsaw.
Donkam ban maramot kloi ïa kino kino ki jingsynjor ha ïing la ki dei ki jingkhang ne jingkhangïit, peitngor bha ïa ka sawdong sawkun ïoh don ki jaka riat ba don jingma ne ba la synjor, pyntip sha ki bor ba dei khmih ban lait na kino kino ki jingmynsaw.
Ki kmie ki kpa ki dei ban peit bha ïa ki khun ki kti ba kim dei ban ïalehkai shabar ha ka por ba hap slap ne jur phria. Ki nongri jingri bad nongsharai masi muid bad blang ki dei ban kiar ban ïalam ïa ki jingri sha ki jaka lum ha ka por ba don ka jingthaba leilieh ba jur bad neh slem. Kiar na kaba pynrieh ïa ki ha trai ki dieng ha ka por ba don ka jingpom pyrthat.
Donkam ban shah skhor bad kohnguh ïa ki jingmaham ba lah pymih da ki bor jong ka India Meteorological Department bad ki bor pynïaid district. Lada don kino kino ki jingmynsaw na ka liang ki briew ne ki jingri jingdup, donkam ban pyntip kyrkieh hapoh ka arphew saw kynta sha u BDO jong ka Mairang Block bad ka Mawthadraishan Block lane sha ka Veterinary Department.
Na ka bynta kino kino ki jingjia dei ban pyntip mar mar sha kine ki phone number ba lah ai da District Disaster Management Authority Eastern West Khasi Hills District Mairang. Block Development Officer Mairang 08981591631, Block Development Officer Mawthadraishan 09774126727, District Disaster Management Officer 9485005523 bad ka District Control Room- 03657-282254/1077.
