Shillong, Jylliew, 05: Lai ngut ki samla kiba kynthup ïa ka samla Sunmisha Nongbet ryngkat lang u samla Sanki Siangshai bad ka samla Glory Chyrmang kiba la ïoh khur ïa ka nam jop ha ka Khasi Jaiñtia Got Talent 2024 kaba la long ha ka 11 tarik, Nohprah, 2024 ha madan ME School Mukhla (madan Thad), West Jaiñtia Hills District ki la kam bad kynnoh ba ki la shah thok ha ki nongïalam jong ka Khasi Indigenous Foundation (KIF) ba la lamkhmat da u Bah Niman Shadap kum u President.
Kine ki lai ngut ki samla ki la aipor 15 sngi ïa ki nongïalam jong ka Khasi Khasi Indigenous Foundation (KIF) ban ai noh ïa ka khusnam kaba ki dei dok ban ïoh hynrei lym kumta ki byrngem ruh ban mudui sha ka aiñ pyrshah ïa ki nongïalam jong ka Foundation.
Katkum ka jingïathuh, ka samla Sunmisha Nongbet kaba jop ïa ka nam lahduh ka dei ban ïoh ïa ka song pisa ba la pynbna T.2 lak, u samla Sanki Siangshai bad ka Samla Glory Chyrmang kiba wan baar ki dei ban ïoh ïa ka khusnam da ka song pisa kaba T.1 lak.
“Nga la long ka nongjop ban ïohrah ïa ka nam lahduh ha kaba ka khusnam ka long da ka pisa kaba T.2 lak. Ha kane ka sngi ïa ka khusnam pisa ym shym la ai ïa ngi hynrei la shu ai tang ïa ka syrnot bad trophy,” la ong ka samla Sunmisha Nongbet kaba sah ha Madan Mawkhar, Shillong.
“Ha kane ka sngi ki la kular ban ai da ka Cheque bad ïa ka syrnot ha Shillong Press Club khlem da buh ïa ka tarik,” la ïathuh ka samla Nongbet.
Ka la ïathuh ba ki nongïalam jong ka Khasi Indigenous Foundation (KIF) ki la shu phah da ka Message lyngba ka WhatsApp ha ka 6 tarik, Kyllalyngkot, 2025 ban ai noh ïa ka khusnam ha ka 29 tarik, Lber, 2025. Hynrei shwa ka 29 tarik, Lber, 2025 ka la ïoh pdiang ïa ka Message shi sngi shwa ba la thoh kumne “Ngi dap da ka jingsngewsih ban pyntip sha phi ba ngim lah ban ai ïa ki khusnam jong phi lashai. Khublei shibun ïa ka mynsiem ïaishah slem jong phi. Ngi pynthikna ha phi ba ha u bnai Jymmang, 2025 ngin ai ïa ki khusnam jong phi.”
Ka la ïathuh ruh ba naduh katei ka sngi, wat haba ka pyrshang ban telephone ban wat ban phah message ïa u President um ju shim satia ïa ka phone bad um jubab eiei hi ruh.
