Jowai, Jylliew 05: Kum shi bynta ka jingrakhe sngi pynneh pynsah Mariang ha satlad ka pyrthei na ka liang u ma Cresentus Susngi MDC ka Nangbah Mihmyntdu ula khot pynlong ïa ka jingïalang kaba lyngkot harud Thwai Sahsahkti wah Myntdu, kaba ha Mihmyntdu hapoh ka jingpynïaid jong u Chairman shnong jong ka Mihmyntdu u ma S. Phawa.
U ma Cresentus Susngi haba kren ha kane ka sngi u pynpaw ïa ka jingkmen haba kum u MDC jong ki u la ïoh ïa kane ka lad ban pynlait symbai dohkha ha kane ka Thwai Sahsahkti wah Myntdu, ka ba don ha shnong Mihmyntdu. U ma Cresentus Susngi haba kren ha kane ka sngi u ong ha ryngkat ka jingïasngewthuh lang bad u Waheh Shnong bad ki nongkitkam shnong jong ka shnong Mihmyntdu, la jied ïa kane ka Thwai Sahsahkti ban pynlait ïa kine ki arhajar tylli ki symbai dohkha bad u kyntu ïa ki ba kin ri kin sumar ba kine ki dohkha kiba la pynlait kin heh kin san na ka bynta ka jingmyntoi jong ki nongshong shnong bad u da kyntu ba kin peitngor na ki nonglehkam sniew kum ha kaba ber Dawai, tongjar, tongsasi bad kiwei de ki jingleh dusmon ha kaban pynïap ïa kine ki dohkha kiba la pynlait.
Ha ka juh ka por u ong ba na ka liang jong u kum u Nongmihkhmat jong ki sha ka Jaiñtia Hills Autonomous District Council un wad ki lad ki lynti ha ka ban tih pynheh bad pynbha shuh shuh ïa ki sawdong sawkun jong kane ka Thwai. Nangta u ong ka jaka ka long kaba bit bha bad u kyntu ïa ki Nongshong shnong ban ïatreilang bad u ha kaba un thaw ki lad ki lynti na ka liang jong u (MDC) haduh ban da pynlong ïa kane ka jaka kum kawei na ki jaka jngohkai ka ban khring ïa ki paidbah napoh ka District bad nabar ban wan jngohkai ïa kane ka jaka.
Ha shwa ka jingkren na u ma Cresentus Susngi, MDC la ïoh ïa ka jingkren pdiang burom bad sngewnguh ïa u MDC da u Waheh Shnong jong ka Mihmyntdu ma Abul Phawa.
