Shillong, Jylliew 03 : U Bah PT Sawkmie, MLA barim u la pynpaw ba u la hap ban ïai buddien ïa ki skhim ki bym pat ïoh kiba u la ai naduh ka por ka jinglong MLA jong u.
U la pynpaw ïa kane haba kren sha u nongthoh khubor ba ki don ki shnong, ki skul, ki sport club bad ki seng Samla, kiba la ïakynduh bad pyntip sha u ïa ka jingbym pat ïoh ïa ki skhim ba la ai ha ka por jong u.
Napdeng kine kawei na ki skul ka St. Francis D’Assisi Higher Secondary School kaba don ha Mawlai Kyntonmassar ka la pyntip sha u ba ka MLA skhim kaba u la ai bad mang naduh u snem 2022 ha ka por ba long MLA ma u kaba long 5 lak tyngka ban pynkha ïa ki kamra klass jong ka St. D’Assisi HSS, kaba ki la dep ïoh shiteng, kaba long 2 lak 50 hajar tyngka, hynrei kaba sah pat kim pat ïoh.
Mar ïa ïoh jingtip u Bah Sawkmie u la buddien bad mynta kane ka skul ka la ïoh lut ïa kaba sah baroh kaba u la aiti ia ka shithi sanction ha ka sngi Balang ka 3 tarik u Jylliew, 2025 ha ka kti u Principal Brother, Sylvester Lugun jong ka skul St. Francis. Haba ïa dei bad kane ka jingslem u bah Sawkmie u la pynpaw ïa ka jingsngewsih ba la ar snem shiteng mynta kane ka skul St. Francis kam pat ïoh kaba long kaei kaei kaba sngewlyngngoh bha.
Kumta kum u briew uba ju ïai shakri ïa ki paidbah un ym lah ban shu peit bad shu sngap ïa ka jingeh ki paidbah.
Ha ka juh ka por u bah Sawkmie u kyntu ruh ïa ka tnad PWD ba kan pyntreikam noh ïa ki kam, naba ki kontraktor ki la dep thep ïa ki call deposit na ka bynta ka jingpyntrei ïa ka project ha Nongpdeng, Nonglum bad Umjaiur.
