Bun na ki paidbah ha kine ki sngi ki la hap ban pynïeng ïa la ki jong ki kali ha ki rud surok, ki la don ruh kiba la shu pynïeng wat ha ki jaka ba la mana bym shah ban pynïeng kali (No Parking Zone). Ha kine ki sngi ka long shisha kaba eh ban ïoh ban pynïeng kali ha ki thaiñ Motphran, Khyndailad bad katto katne ki jaka ba long ïew khamtam eh lad ki kwah ban leit thied jingthied. Kum ban shu ong noh ka jaka pynïeng kali kaba la pynpra noh ha Motphran haduh mynta kam pat i don jingkyrmen satia sa haduh katno snem yn lah ban ïohi ïa ka jaka pynïeng kali ha kane ka jaka kaba thymmai.
Lada kane ka jinglong jingman kan ïaineh sah kumne ka jingeh jong ka jingkhapngiah kan nangkiew nangkiew bad nangjur manla ka sngi namar tang ka jingkiew kiba don ki kali ka la nangkiew.
Kumba la ïathuh ha ki por ba long dorbar Assembly la ïathuh ba hapoh ka tnat District Transport Officer (DTO), kim duna ïa ka 25 hajar tylli eiei ki kali kiba la wan ban register thymmai hapoh kane ka Ophis.
Ka thaiñ Laitumkhrah kaba long ka pdeng jong ki shlem pule kat shaba phai ka long kaba khapngiah da ki kali kiba ieng harud surok la ka long ha ka por mynstep ba dang long skul bad ynda ladei ka por wai skul. Ka jingdheng kali ha ka thaiñ Laitumkhrah ka dei hi na ka jingieng lymmuh jong ki katto katne ki nongñiah kali kiba don ïa ka mynsiem sngewmeng da kaba leh matlah bad ym kheiñ snep wat ïa ki Pulit pynïaid kali kiba trei shitom naduh mynstep haduh ban da miet ban weng ïa ka jingdheng kali.
Ka jingkhapngiah ka nongbah Shillong ruh kam dei tang da ka jingdon ki kali ba napoh ka nongbah hynrei la ïohi ba na baroh ki district ki kali ki wan beit sha Shillong ha kaba kane ka la nang pyndap shuh shuh ïa ka jingkhapngiah bad dheng kali ruh kaba manla ka sngi.
Kumba la ïohi ha Nongbah Shillong ki la don tang kumba 4 ne 5 tylli ki jaka pynïeng kali kiba ka Meghalaya Urban Development Authority (MUDA) kiba don ha Shillong bad kine ruh mynta kim lah shuh ban pynbiang jaka ïabaroh ki kali kiba don ha Shillong bad kumjuh ruh na ka bynta kito kiba wan na kiwei pat ki District.
Lah ban ong ba ka jaka pynïeng kali jong ka MUDA kaba don ha Khyndailad ka la long kawei na ki jaka pynïeng kali kaba la khapngiah bha bad don kiba ïathuh ba lada kwah ban pynïeng kali ha katei ka jaka mynta ka la shem shitom bha bad ki briew kiba kwah ban pynïeng kali ha katei ki la hap ap da u laiñ ban ïoh pynïeng ïa ki kali jong ki ha katei ka jaka, don ruh kiba ïathuh ba kin hap pynïaid pyllun pyllun katei ka jaka tang ban ïohi ïoh don ki kali kiba mih khnang ba kin ïoh ban pynïeng ïa la ki jong ki kali ha katei ka jaka, hynrei ynda ki la pynïaid ïa la ki jong ki kali pyllun pyllun la bunsien hynrei watla katta ruh kim ïoh lad ban pynïeng ïa la ki jong ki kali bad bun ki la hap ban leit phai noh sha la ki jong ki ïing tang na ka daw ba kim ïoh ban pynïeng ïa ki kali khnang ba kin ïoh ban leit thied jingthied napoh ka Khyndailad.
Dei na kane ka daw ruh ba bun na ki briew ki la hap ban pynïeng ïa la ki jong ki kali harud surok bad dei na kane la ïohi ba shilynter ka surok jong ka Khyndailad la dap da ki kali baroh arliang, shiliang la pynïeng da ki Taxi Kamai ne ki stand taxi bad sha kawei pat la pynïeng ki kali shimet.
Kane ka jingpynïeng ha baroh arliang ka la nang pynrit shuh shuh ïa ka surok bad dei na kane pat ka daw ba la pynlong ïa ka jingdheng kali kaba jur manla ka sngi.
Kane ka bym biang ki jaka ïeng kali ka wanrah ïa ka jingeh ruh wat lada ka sorkar ka thmu ban pynheh ïa ka surok kaba ha Nongbah Shillong.
Katkum ki kyndon jong ka Meghalaya Building Bye Laws ki dukan kiba heh ne ki Commercial Complex khamtam eh kiba don ha ka Shillong ki dei ban donlang bad ki jaka pynïeng kali, hynrei ym sngewthuh shuh balei ki dukan heh kim don ïa ki jaka ïeng kali bad ka lah ban don kaei re kaei kaba kitei ki dukan heh ki pynkheiñ ïa ki kyndon ka building bye laws bad ha kano ka rukom ba ki la ïoh ka jingbit ban pynïeng ïa ki dukan imat kam don hi ruh ka jingleit jurip ha shwa ba kin tei.
Ka sorkar MDA hapoh ka jingïalam jong ka NPP kaba la ïohi jngai ïa ka jingkhapngiah jong ka sor Shillong ka la pynstet ban shna ïa ki ophis Sorkar sha New Shillong Township kaba dang ïaid mynta shakhmat.
Ngi kyrmen ba kane ka jingthmu jong ka Sorkar kan urlong noh tang hapoh ki 5 bad 10 snem ki ban sa wan namar ka jingkhapngiah jong ka sor ka la long shaba palat liam khamtam ha ki aiom ba dei ka lehniam Puja, Christmas.
