Shillong, jylliew 04: Kum shi bynta jong ka jingrakhe ïa ka Olympic Day 2025 na ka liang jong ka Meghalaya State Olympic Association (MSOA) kan pynlong ïa ka jingïakob mareh kaba 10 kilomitar lane ka ‘6th 10K RUN’ ha ka 21 tarik mynta u Jylliew, 2025 na ka bynta ki shynrang bad kí kynthei.
Ha kane ka jingïakop mareh yn pdiang naduh ki khynnah samla kiba la 18 snem shajrong kumjuh ruh ïa kiba la rangbah kiba 50 snem shaneng, shynrang bad kynthei. Ka jingmareh kan sdang ha ka por 6 baje mynstep na J.N. Stadium, Polo Ground.
La pynkhreh ruh ïa ka khusnam pisa na ka bynta ki nongjop, ha kaba kiba wan ba nyngkong kin ïoh T.5000 tyngka, nangta kiba wan kin ïoh T.3000 tyngka katba kiba wan kyrdan balai kin ïoh khur ïa ka khusnam pisa kaba T.2000 tyngka.
Ka synjuk ka la pynbna ruh ban sam ei ïa ki T Shirt khlem da donkam siew bad kan long ha ka rukom ïa kito kiba wan nyngkong, bad yn ai ruh ïa ki jingbam hadien ba la depmareh. Ka MSOA ka ïa wer bad khot sngewbha ïa baroh ban ïashim bynta ha kane ka jingïakob mareh.
Ka MSOA ka pyntip ruh ba kito kiba kwah ban ai kyrteng lane Register na ka bynta kane ka jingïakop mareh kan long ha ophis treikam jong ka MSOA, kaba marjan bad ka J.N. Stadium Polo Ground naduh ka 1 baje haduh ka 5 baje janmiet ha ka por long trei. Nangta ka tarik ba khatduh ban register kan long ha ka 18 tarik u Jylliew, 2025.
Ka lynti ban mareh kan sdang na JN Stadium Gate No. 1 – ter ter sha Polo Bazar – nangta sa phai sha ka diang sha 4th Furlong – B.K. Bajoria Junction – phai sha kamon sha B.K. Bajoria – PGT College – Shillong Commerce College – Shillong College – Don Bosco Square – phai sha kadiang sha Laitumkhrah Police Point – Laitumkhrah Police Beat House – Fire Brigade – St. Edmund’s School – Dhankheti – Malki Point – Barik Point – Civil Hospital – bad phai sha kamon sha State Central Library – Meghalaya Secretariat – DC Office – phai sha kamon sha Governor House – phai sha kadiang sha Wards Lake – CM Bungalow – Polo Tower – Polo Bazar bad pynkut ha JN Stadium Gate No. 1.
Kane ka long katkum ka kyrwoh ba la phah da u General Secretary ka MSOA, u Bah Finely L. Pariat.
