Nongstoiñ, Jylliew, 01: La kumba katto katne snem naduh ba ka ophis treikam jong ka Krishsi Vigyan Kendra ka la don ha Nongshilong, bun bah ki nongrep jong ki ar tylli ki district ka Eastern West bad ka West Khasi Hills, ki la ïoh ïa ki jingmyntoi lyngba ki lad jingïarap ba ka sorkar ka la mang kyrpang kiba la pyntreikam lyngba katei ka tnad trei kam.
Nalorkata katei ka ophis ka ju ai jinghikai ha ka rep ka riang, ri dohkha, ri jingri kum ka kam ri sniang, ri syiar bad kiwei kiwei bad ka plie lad ruh ïa ki nongrep ba kin applai ïa ki skhim ba bun jait kiba ïadei bad ka rep ka riang na ka sorkar.
Kaba kham sngew tynnad ka long ba ka jingpyntreikam jong ka sorkar pdeng ïa ka ka prokram ba kyrpang, kaba la tip kum ka Viksit Krishi Sankalp Abhiyan kumba la bthah da ka Ministry of Agriculture & Farmers Welfare, kaba la sdang naduh ka taïew ba khatduh jong u bnai Jymmang, ha ryngkat ka jingleit pynshai paitbah sha ki shnong bapher bapher kiba hap ha ki artylli ki district, ka la nang ai mynsiem shuh shuh ïa ki paitbah nongrep bad nong ri jingri.
Haba phai sha ki paitbah nongshong shnong jong ka West bad Eatern West Khasi Hills District kat haduh kine ki sngi, la lap ba 45 % ki dei kiba im ha ki kam bylla kam sngi bad 30 % ki dei kiba im ha ka rep ka riang bad lada kheiñ lang ïa kiba im ha ka bylla ka sngi bad ki nongrep ka poi haduh 75 %.
Kumta ka dang donkam haduh katta katta ba ka sorkar kan pynkhlaiñ shuh shuh ïa ka jingtrei kam jong ka Krishi Vigyan Kendra, la ka long ha kaba thung ïa ki nongtrei, ban pynbiang ïa ki jingdon kam bad pynshlur ïa katei ka tnad ba kan pynlong khah khah ïa ki short trem training na ka bynta ki nongrep lyngba ki rukom rep ba thymmai kat kum ka juk ba mynta.
Nalor kata ka jingpynlong ïa ki jingïakynduh lang jong ki nongrep ryngkat bad ki ophisar jong katei ka tnad treikam, ban ïaphylliew jingmut ha kaba ïadei bad ka rukom rep ïa ki jait jingthung kiba ïadei katkum ki jaka bad kat kum ka jinglong ka suiñ bneng ka long kaba don kam haduh katta katta katta.
Kawei pat kaba donkam ka long ba ki nongrep bad ki nongri jingri, ki dei ban don ka jingïatreilang kaba jan bha bad ki ophisar jong ka KVK, khnang ba ka kam jong ki kan long kaba seisoh bad kaba ai jingmyntoi ha baroh ki liang.
