Jowai, Jymmang, 30: Ka Jaiñtia National Council (JNC) Western Zone ka la dawa na ka tnat Bording ban pynïoh bording noh ïa ka shnong Madan Pohkseh, West Jaiñtia Hills District.
Ka shnong Madan Pohkseh ka dei kaba hap hapoh ka Laskeiñ C&RD Block bad ka dei ruh ka shnong kaba la rim bha.
“Ha kane ka juk ban shong khlem bording kan long ka jingduhnong kaba khraw ha baroh ki liang khamtam ha ka pule dangle ki khynnah skul” ong u kyrwoh na ka seng.
Hadien ka jingud jingnam jong ki nongshong shnong ka shnong Madan Pohkseh halor ka jingbym pat don ka bording hapoh shnong, ka seng hapoh ka jingïalam jong u President u Bah Hamehi Bamon ha ka sngi Palei ki la leit ïakynduh ïa u Executive Engineer jong ka MePDCL, Jowai Distribution (Sub-division), West Jaiñtia Hills District Bah L.Syngkon.
Ka seng ka la aiti ruh da ka jingthoh ha u Bah Syngkon ban pynïoh bording noh ha ka shnong Madan pohkseh, West Jaiñtia Hills District.
U Executive Engineer u la kular ha ki dkhot ka JNC ban pynïoh bording ïa ka shnong bad un sa thep kyrteng noh ïa kane ka shnong Madan Pohkseh ha ka skhim RDSS on Electrified Households namarb a lyngba kaba ka skim la buh thong ban pynpoi ïa ka bording ha baroh ki longïing.
U la ong ruh ba tang katto katne bnai yn sa lah ban khot ïa ka Tender bad u la pyntikna ruh ba hapoh une u snem yn sa pynïoh bording ïa ki longïing kiba don ha ka shnong Madan Pohkseh lyngba ka RDSS.
“Ngi kyrmen skhem ba kane ka jingdawa ban pynïoh bording elektrik ïa ka shnong Madan Pohkseh kan long shisha kumba u Executive Engineer u la kular ban leh ïa kaba donkam tam na ka bynta ka jingbit jingbiang ka ban long ruh ka jingkyrkhu ïa ki paidbah nongshong shnong jong ka Madan Pohkseh, West Jaiñtia Hills District,” la ong u President ka JNC.
