Shillong, Jymmang 28: Ka St Nanak Secondary School bad ka Nongthymmai Nepali School ki la rah ïa nam lahduh ha ka kyrdan U-18 bad U-15 boys’ (marïabud) jong ka lympung lehkai kriket kaba la tip da ka Inter-School Cricket Tournaments 2025, ba la pynlong da ka Shillong Cricket Association.
Ha ka jingïakhun ïa ka final jong ka kyrdan U-18, ka St Nanak ka la pynliem noh ïa ka St Anthony’s Higher Secondary da 16 ron katba ka Nongthymmai Nepali ka la jop ïa ka BK Bajoria School da 49 ron ban rah ïa ka nam lahduh ha ka kyrdan U-15.
Haba phai sha ka jingïalehkai jong ka U-18, ka St Nanak ka la jop ïa ka jingkynting pisa (toss) bad ka la kam trai ban tied nyngkong, ha kaba ka la kamai 117 ron shuwa ban khyllem baroh ki wiket haki 20 ober. U Ganesh Kumar Ray u la long uba kongsan tam ha ka tied da kaba kamai 77 ron naki 67 bol, kaba la noh synñiang shibun ban kyntiew ïa ka ron na bynta ka kynhun. U Samelawan Nongkseh jong ka St Anthony, u la khur 3/28 naki 4 ober.
Related Posts
Hadien kata, ka St Anthony’s ka la shah pynkhyllem noh da tang 101 ron ha ki 18.3 ober, ha kaba tang u Abhinav Khanal u la lah ban noh synñiang kham bun da kaba kamai 34 ron na ki 45 tylli ki bol. U Binay Kumar Mahato u la khur 4/18 ha ki 4 ober na ka bynta ka St Nanak bad u Ganesh Kumar Ray u la khur ïa ka khusnam Player of the Final.
Ha kawei pat ka final jong ki U-15, ka Nongthymmai Nepali ka la jied ban tied nyngkong hadien ba jop ïa ka jingkynting pisa (toss). Kane ka kynhun ka la lah ban kamai 103 ron bad hap 6 wiket haki 15 ober. U Suraj Chettri u la tied 47 ron naki 42 bol, katba u Samarth Pathak rangkawang bol ka liang pyrshah u la khur 3/11 naki 3 ober.
Haba jubab, ka BK Bajoria ka la shah pynkut noh da tang 54 ron na ki 12.2 ober, ha kaba u Kavinstar Sawkmie u la ïoh ban khur ïa ka jingkheiñ ba bha tam kaba long 3/4 ha ki 2 ober. Nalor ba kamai 47 ron ha ka tied u Suraj ula ïoh ruh ban khur ar wiket ha ka bol kaba la pynlong ïa u ban khur ïa ka khusnam Player of the Final.
Ha ka jingïakhun final la wan sakhilang ïa ka da u President ka Meghalaya Cricket Association u Nababrata Bhattacharjee, u Honorary Secretary ba rim jong ka MCA u Bah Gideon Kharkongor bad u President ka SCA u Bah Peter M Kharsawian, nalor kiwei pat.