Khliehriat, Jymmang, 28: U Bah Benedict Salahe na ka shnong Shyrwang, East Jaiñtia Hills District u la mih shakhmat ban ai jingpynshai sha ki paidbah khnang ba kin lait na kano kano ka jingshah thok, shah shukor kaba lyngba ki Cyber Crime, ka jingpynshai ka long katkum ka jinglap bad ka jingïakynduh jong u hi bad ki briew kiba pyrshang ban pynngop ïa u ha ki kam thok kam shukor lynga ka online.
U Bah Salahe u la ïathuh ba wat ïa ka Facebook Accounct jong u la pyndonkam bakla da ki briew kiba thmu ban thok bad shukor.
Halor kane u Bah Salehe ha ka sngi Baar u la leit ujor sha u Superintendent of Police ka East Jaiñtia Hills District,
U SP ka East Jaiñtia Hills District Giri Prasad u la ïathuh ba ka tnat Pulit ka la shim khia ïa kane ka kam bad marmar hi la ai jingpynbna ha ka Facebook Account jong ka tnat Pulit ka East Jaiñtia Hills khnang ba ki paidbah ki long kiba husiar ban lait na kino kino ki jingshah pynngop ha ki kam thok kam shulor.
Ka ophis u Superintendent of Police, East Jaiñtia Hills District, ka la kyntu ïa ki riewpaidbah ban kiar na kaba jubab ïa kino kino ki phonecall ne SMS ba ïoh pdiang na ki number kiba nabar ri. La pyntip ruh ba kiba bun ki Facebook Account, Instagram, Whatsapp ba riam dur bula ki leh ïa ki kam pyrshah aiñ kum ka kam thok ha ka liang ka pisa, nalor kiwei kiwei ki kam thok kam shukor.
U SP ula pynbna ruh ïa kawei ka Facebook Account Profile kaba leh ïa kum kine ki kam bad phone ïa ki briew da u number Number +234-90393727219.
Lada don kino kino kiba ngat haki kam thok Online ki lah ban pyntip da kaba telephone ha u number 1930.
