Ïasyllok u Dr Mukul bad ki nongsumar ka CHC ha Chokpot, kular ban ai jingkyrshan ba pura

Shillong, Jymmang 28: U nongïalam ka Liang pyrshah bad u Myntri Rangbah barim ka jylla u Dr Mukul Sangma u la leit ban jurip ïa ka Community Health Centre (CHC) kaba don ha Chokpot, South Garo Hills. Kane ka jingleit jngoh jong u, ka long shi bynta na ka jingpyrshang ban sngewthuh ïa kiei kiba la jia shisha ha kane ka jaka sumar bad ban shim ki jingkheiñ ïa ki kam ba la mad da baroh ba kynthup ïa ka jingdon ki tiar sumar bad ki jingeh ba mad da ki nongshong shnong ha ki thaiñ nongkyndong.
U Dr Sangma u la ïasyllok ruh bad ki doctor, ki nurse, bad ki nongtrei ka CHC bad u la ïaroh ïa ki jingaiti jong ki ïa ka kam ban ai ka jingshakri ha ka kam sumar wat hapdeng ki jingeh ba bun. U la pynshlur ruh ïa ka kynhun ki nongsumar ban pynlong ïa ki jingïalang ka Hospital Management Committee (HMC) manla ka por ban pynthikna ka jingïatreilang kaba bha bad ban pynbeit ïa ki jingeh kiba mih na ka por sha ka por.
Ha kane ka jingleit jngoh, u Dr Sangma u la sngap ruh ïa ki jingsngewkhia ba bun ba la pynpaw da ki nongtrei bad ki nongshong shnong, bad u la pynthikna ban ai ka jingkyrshan kaba pura bad ka jingïatreilang ban wad ïa ki sienjam ban pynbeit ïa kine ki jingeh. U la banjur halor ka jingdonkam ban ïoh ka synshar kaba ai jubab bad ka jingshakri kaba bha khamtam ha kine ki thaiñ kiba dang donkam kum ka Chokpot.
U Dr Sangma u la pynpaw ka jingsngewhun halor ka jingpyni kam jong ki doktor, ki nurse bad ki nongtrei bad ai khublei ruh ïa ka kynhun baroh kawei ba kin dang ïaibteng ban shakri ïa ka imlang sahlang.