Khliehriat, Jymmang, 25: U U Bah Kerlang Ksoo uba dei u Muktiar na East Jaiñtia Hills District ha ka sngi Palei u la dawa ia ka Executive Committee jong ka Jaiñtia Hills Autotnomous District Council (JHADC) ban buh noh ia ka shnat treikam jong ka Council ha East Jaiñtia Hills District khnang ban pynsuk ia ki jingdonkam jong ki paidbah.
Ha ka dorkhas, ba la phah sha u Chief Executive Member (CEM) ka Jaiñtia Hills Autonomous District Council (JHADC) Bah Thombor Shiwat, u Bah Ksoo u la dawa ba la donkam ban buh noh ia ka shnat treikam jong ka Council kum ka Reception bad ka Judicial Branch ha East Jaiñtia Hills District.
U Bah Ksoo u la pynpaw ruh ba ka jingbym don ka Reception bad ka Judicial Branch ka pynlong ïa ki paidbah jong ka district ban leit shaduh Jowai ban pyndep ïa ki kam wat lada dei tang i kam iba rit ruh kum kaba leit thied ïa ki Application Form bad kiwei kiwei ki jait Form ruh kiba ïadei bad ki kam mokutduma.
“Ka jingbym don jong ka tnat treikam ka buh jingeh khamtam ïa ki baduk bakyrduh namarba wat tang i kam iba rit ruh ki hap ban pynlut bai leit bai wan shaduh Jowai,” ong u Bah Ksoo ha ka dorkhas.
“Ka dei ka kamram jong ka Jaiñtia Hills Autonomous District Council ban pynjan sha ki paidbah ha kaba ai jingshakri ïa ki paidbah bad ka jingdon ki tnat treikam ha ki jaka bapher bapher kan pynkloi ruh ïa ki kam ban pyndep ban pynioh ïa ki hok jong ki paidbah bad ka pynsuk bad pynsting ruh ïa ki paidbah kiba donkam ban pyndep bad ka JHADC bad pynkloi ruh ba kin ioh ïa ki Form ba ki donkam,” u la bynrap.
U la ong ruh ba kam long kaba eh ïa ka JHADC ban plie ïa ki tnat treikam namar ka Council ka don da ki spah ngut ki nongtrei bad kaba donkam mynta ka long tang ban thung thymmai ïa ki nongtrei ha ka kyrdan Grade-III bad Grade-IV.
