Shillong, Jymmang 25 : Bun bha ki nong Meghalaya khamtam ki Khasi kiba sah trei bad pule ha nongbah Delhi ki la kynduh lang khrui ha nongbah Delhi ha ka sngi Saitjain ban pynshongkun ïa ka lympung Mr bad Ms Hynñiewtrep kaba la pynlong da ka KSU Delhi Unit ha Meghalaya House, Dr APJ Abdul Kalam Road, Delhi.
Ha kane ka janmiet la donlang ruh naduh u Symbud Myntri Rangbah ka Jylla Bah Prestone Tynsong, nangta u MP ka Tura u Saleng Sangma, u MLA ka Jowai Bah Wailad Shylla bad ruh u Bah Daniel Thongkhiew ba dei u Officer on Special Duty jong u Myntri Rangbah. Katba na ka liang ka KSU la wan ban donlang naduh u President Rangbah ka Seng u Bah Lambokstarwell Marngar nalor kiwei kiwei.
Ha kane ka jingïakob rang bad bad thei bhabriew ki la don hynriew ngut ki samla shynrang bad 11 ngut ki samla kynthei kiba wan ban shim bynta. Hapdeng ka jingïakob kaba shongshit bha, u samla Franklin Marwein bad ka samla Aidamon Talang ki la ïoh ban rah ïa ka nam lahduh.
Ïa ka jingïakob la pynlong ha ki lai kylla kata ha ka Traditional Round, Casual Round bad kaba khatduh kadei ka jingjubab ïa ki jingkylli ba la buh da ki nongbishar.
Kumta ha kaba khatduh hadien ba la dep ban bishar lut, ïa ka nam lahduh ha ka liang ki shynrang la ïoh da u samla Frankllin katba u samla Poimi Pdang u la ïoh ïa ka First Runners Up bad u samla Ernie Kharchandy u la ïoh ïa ka nam Second Runners Up.
Nangta ka liang ki samla kynthei pat ïa ka nam lahduh la ïoh da ka samla Aidamon bud sa ka samla Gabriella Duïa bad ka samla Enrica Ronghang ha ka kyrdan kaba ar bad ba lai.
Na ka liang u Symbud Myntri Rangbah, kumjuh na ka liang u Bah Daniel bad ruh u President ka KSU ki la ai ka burom ïa ka jingtrei borbah jong ki nongïalam ka seng ha ka jingïakhun ban ïarap, ïada bad plie lynti lem ïa ki nongshong shnong ka jylla kiba kynduh ïa kiba bun ki jingeh ha nongbah Delhi.
Na ka liang u Bah Daniel haba kren ha kane ka jingïalang u la ïathuh ba ha ki snem 2002 ter ter ba u don ha Delhi ki kynduh bun ki jingeh kiba dang don haduh mynta mynne ruh.
“Hynrei ha kito ki por pat ngi hap ban ïakhun hi dalade katba mynta pat ki paidbah ka jylla ki donbok ba la don ki samla KSU ban ïarap ïa ki paidbah ba wan na Meghalaya bad kumjuh na ka thain shatei lam-mihngi jong ka Ri haba ki kynduh ïa kano kano ka jingeh.
“Phi la ïohsngew ba haduh katno ka KSU Delhi ka ïarap ha nongbah Delhi ïa ki nong Meghalaya,” u la bynrap biang.
Shuh shuh u la ong ruh ba ki paidbah Meghalaya ki shaniah ha ka jingïalam jong u Myntri Rangbah Conrad K Sangma bad kumta u kyrmen ba ki nongshong shnong kiba khlem poi iing shuh la slem kin sa lyngoh ynda ki ïohi ïa ki jingkylla kiba bun ynda ki la leit shnong.
“Ngi don hangne i Bah Prestone Tynsong, Symbud Myntri Rangbah u nongïalam ba radbah na ka Jaidbynriew Khasi uba la pyni da ki nuksa ban wanrah shibun ki kam pynroi bad ban wanrah ïa ki jingkylla ha ka jylla. Ka jingdonlang jong i ha kane ka sngi ka la ai mynsiem haduh katta katta ïa ki samla kiba wan ban pule bad wan trei ha nongbah Delhi,” u la ong.
Ha kajuh ka por u Bah Daniel u la ai nam ïa ka KSU kaba la trei na ka bynta ban ïarap bad ïada bad btin lynti ïa ki nong Meghalaya kiba wan trei bad wan pule ha nongbah Delhi. U ong ruh ba dei lyngba kum kine ki prokram kiba plei lad ïa ki nongshong shnong ka jylla ban ïa kynduh para shnong.
“Kane ka juk mynta kadei ka juk jong ka jingïakob, kadei ruh ka juk ban mih shabar ka jylla ban ïoh ïa ka jingpule bad ki kam kiba kham biang. Hynrei phim dei pat ban klet noh ïa la ka tynrai bad naei phi mih,” u la bynrap biang.
Haba bynrap lang u President ka KSU u la ong ba ki sngew sarong ban ha kane ka sngi ka KSU Delhi Unit ka la lah ban pynlong ïa kum kane ka prokram ban pyni ïa ka kolshor bad ka jingriewspah jong ka jylla ba kan ym sah tang ha rilum lajong hynrei ban pynsuhthied wat sha nongbah Delhi.
