Nongpoh, Jymmang 24: Ki nongïalam ka Hynñiewtrep Youth Council, Ri-Bhoi Sepngi hapoh ka jingïalam u samla RC Thangkhiew kum u President lem bad ki dkhot hynnin ka sngi ki la ïoh ban bat kumba 16 ngut ki bar jylla ki bym biang ki kot ki sla kiba la sah bad trei bylla beaiñ hapoh ka dong bad ka thaiñ jong ka Ri Bhoi sepngi.
Ki nongïalam ka seng ki la ïoh ban bat ïa kitei ki 16 ngut ki bar jylla na ki ar tylli ki shnong kata na ka thaiñ Umsong bad Mawskei haka thaiñ Jirang kiba la trei bylla beaiñ khlem ki kot ki sla kiba biang bad na ka liang ka seng ki la beh noh mardor ïa kitei ki bar jylla bad phah leit phai sha ki jaka ba ki sah.
U samla RC Thangkhiew President ka HYC Ri Bhoi Sepngi u la ïathuh, kumba ka HYC sengkmie ka la pynbna haki sngi kiba la leit ïa ka Sier Lapalang operation kumta kum ki nongïalam hapoh Ri Bhoi Sepngi ki la ïaid shaphrang ban pyntyllun ïa ka, bad lyngba kane ka Sier Lapalang operation ki la lap ïa kine ki bar jylla kiba wan trei sha ki thaiñ Jirang khlem ki kot ki sla kiba biang.
U Bah Thangkhiew u la ïathuh ruh, mar ïa ïoh jingtip ïa kane ka jingdon ki bar jylla mar mar ki la leit ban jurip ha ka jaka trei jong ki bad haka jingbishar bñiah ïa ki kot ki sla la lap ba kitei ki bar jylla kim shym la don wat tang kawei ka kot ka sla kaba biang bad kaba la pynlong ïa ka seng ban phah leit phai noh sha ki jaka kaba ki sah.
U la pynpaw ruh ba ka seng lyngba kane ka Sier Lapalang operation kan nang ïai bteng ban peit pyrman ïa ka jingwan trei ki bar jylla ki bym shym don ki kot ki sla bad ha kajuh kapor u la kyntu ruh ïa ki nongshong shnong bad kin phikir bha ha la ki shnong jong ki bad ha kajuh kapor u phah ruh ka khubor sha baroh ki bar jylla ki bym don ïa ka kot ka sla kaba biang ba kin mih noh mardor na ki jaka sah bad jaka trei bad lada kin dang lap ïa ka jingdon kum kine ki bar jylla ka seng kan nym map leh beit ïa kaba donkam.
