Manchester, Jymmang 24: Ka Manchester City kan leh burom ïa ka jingshakri kaba phylla jong u Kevin De Bruyne ïa ka klob da kaba tei ïa u mot ba kyrpang ban rakhe bad pynsah nam ïa une u rangïalehkai pdeng ba kynsai ha Etihad.
ïa kane la pynthikna mardor hadien ka jingïalehkai ba khatduh jong ka Premier League 2024/25 ha la ïing pyrshah ïa ka Bournemouth, kaba long ka jingïakhun ba khatduh jong une u rangïalehkai ba 33 snem ka rta ha Etihad Stadium na ka bynta kane ka klob ba radbah.
U Kevin De Bruyne u la pynpaw haduh katno u sngew sarong bad sngewnguh shikatdei eh ban ïoh ïa kum kane ka jingñiew burom kaba kyrpang ha ka dur jong u mot.
“Ka mut ba Ngan ïai long shi bynta jong kane ka klob. Lano lano ruh haba nga wanphai bad kiba haïing hasem bad ki paralok, Ngan sa ïohi ïalade kumta ngan sa don beit hangne,” la ong u De Bruyne.
Hadien ka jingïaid lynti kaba jop bad kaba seisoh haduh 10 snem bad ka City, ha kaba u la ïalehkai palat 400 tylli ki jingïalehkai, da kaba ïarap ïa ka Club ban jop 19 tylli ki khusnam lahduh kiba paw, u De Bruyne un mihnoh ha ka aïom lyuir.
Ha kine ki phew snem ba u la don ha Manchester, nalor ki hynriew tylli ki nam lahduh jong ka Premier League, une u rangïalehkai ba 33 snem ka rta u la khur ruh ar sien ïa ka khusnam Premier League Player of the Season, kata ha ka samoi 2019/20 bad 2021/22, bad u la ïoh ruh ban khur ïa ka khusnam Playmaker na ka bynta ka jingbun ki assist haduh lai sien ha ki lai samoi, ha u snem 2019/2017. 2022/23.
Ki 20 tylli ki assist kiba u la ïarap ha ka samoi 2019/20 ka dei ruh ka rekod ba ïasohlang ha ka jingbun assist ha ka shi samoi, u mawjam bad u la ïasam bad u Thierry Henry u rangïalehkai ba pawnam jong ka Arsenal.
Hadien ba la kut ka jingïalehkai ba khatduh hala ïing, la ai ruh ïa u Kevin ïa ka sopti kyrpang ba la buh frame kaba don ïa ka jingsoi jong baroh ki paralok bad ki nongtrei ryngkat bad ka City Season Card ba shi jingim ha ryngkat bad ka pyni ïa ka video ba kyrpang ha ka screen bah jong ka Etihad.
Ha kaba la ai burom ïa u ban tei ïa u mot ba la buh ha ka kyrteng jong u, u De Bruyne un bud ïa ki dienjat ba pawnam jong ki katto katne kiwei pat ki rangïalehkai ba pawnam jong ka City kiba la ïoh ruh ïa ka jingithuh na ka bynta ki jingnoh synñiang kaba khraw jong ki sha ka Club.
Katkum ka website jong ka Manchester City, ha u snem 2021, ar tylli ki mot sahnam la plie shabar jong ka Etihad kum ka jingrakhe ban kynmaw burom ïa u kapten barim u Vincent Kompany, bad u rangïalehkai pdeng u David Silva, ha kaba baroh arngut ki la long ka bynta ba kongsan palat phew snem ha kaba ïarap ban pynskhem ïa ka City kum kawei na ki klob kaba khlaiñbor ha ka phutbol.
Ha u snem 2022 la bud sa uwei pat u mot sahnam, ha kane ka kynti ka long na bynta u Sergio Aguero, kum ka jingithuh ïa u rangthep kol ba pawnam tam jong ka Club ha kaba ka kol ba u la thep ha ka por 93:20 ka la pynlong ïa ka City ban khur ïa ka nam lahduh ha ka Premier League ha u snem 2012.
Mynta u De Bruyne un sa ïoh ïa la ka jong ka jingithuh na bynta ki 10 snem ba la leit noh ban pyndonburom ïa ka histori jong u bad kane ka klob da u mot uba dei hok ban ïoh.
