Shillong, Jymmang 23: Ka khubor ba la ïoh na ki pulit la ïathuh ba u Suskanto Das Gupta u la phah ka jingujor ba ha ka 18 tarik mynta u bnai ha ka por 8 mynmied, ki runar bym lah ban ithuh ki la tuh 12 ton ka jri na ka trok kaba ïeng kaba don u nombar TR-06A-1947 ha Ladrymbai (EJH).
Ha kawei pat ka jingjia u Sapan Barman u la phah ka jingujor ba ki runar bym lah ban ithuh ki la tuh ïa ka scooter jong u kaba don u nombar ML-08J-6912 kaba la pynïeng harud surok ha ka 19 tarik mynta u bnai kaba ha ïew Nakham, kaba ha Tura (WGH).
Shuh shuh u Changrak Ch Marak u la phah ka jingujor ba ka thuk thuk jong u kaba don u nombar AS-18K-7566 kaba la pynïeng ha la ïing kaba ha Allotgre, Tura (WGH) la shem ba la jah.
Ha ka 19 tarik mynta u bnai hadien ka jingïoh jingtip kaba thikna ki pulit ki la ïoh ban khangkdong ïa kawei ka kali kaba don u nombar AS-16A-3375 kaba la shong da uwei u briew uba kyrteng u Elizer G Momin ba la 25 snem ka rta ha Araimile, Tura (WGH) bad ki la ïoh ban kurup ïa u drok ba khia 1.42. Kham hadien ki pulit ki la ïoh bat ïa uwei uba kyrteng u Toseng R Sangma ba la 24 snem ka rta ba la kynnoh ba udei uba la bei pisa ban thied ïa une u drok ba la wanrah da u Elizer G Momin na ïew Garobadha (WGH).
Ka Melinda Ch Marak ka la phah ka jingujor ba ha ka 17 tarik mynta u bnai ha ka por 5 baje mynstep, ka kali Maruti Gypsy jong ka kaba don u nombar ML-08K-3239 la shem ba ka la jah napoh ka Spring Hills, Tura (WGH).
U Kanhaiya Jee Soni u la phah ka jingujor ba ha ka 20 tarik mynta u bnai ha ka por 7.30 baje mynstep, ki runar bym lah ban ithuh ki la prong hapoh ka dukan die jingdeng ba kordor kaba dei trai da ka para jong ka kaba kyrteng ka Gayatri Devi kaba ha New Bhaitbari (WGH) bad ki la tuh haduh 5 carat ki jingdeng ba kordor bad ka pisa T. 35,000/-.
Kawei ka longkmie na Gujarat ka la ujor ba ha ka 18 tarik mynta u bnai, ka la bat ïa kawei ka hotel lyngba ka www.hotelin shilling.com bad ka la siew ruh ka pisa kumba T. 32,760/- sha ka Midtown hospitality India. Hynrei hadien ka la lap ba kane ka website kadei kaba thok.
U Istkhar u la phah ka jingujor ba ha ka janmied jong ka 18 tarik mynta u bnai, u la lap ba ki runar bym lah ban ithuh ki la tuh 9 tylli ki shuttering plate na kawei ka jaka kaba hakhmat ka khyrdop jong ka Air Force Headquarter, Upper Shillong.
U Prabhat Joshi Panthi u la phah ka jingujor ba ha ka 21 tarik mynta u bnai, ki runar bym lah ban ithuh ki la prong hapoh ka ïing sah jong u kaba ha Last Stop, Laban, Shillong bad ki la tuh ka mobile phone jong u.
Kawei ka longkmie kaba sah ha Eastern West Khasi Hills ka la phah ka jingujor ba ha ka 23 tarik u bnai Iaiong, ka la ïohpdiang kawei ka jingshah phone ha kaba une uba phone u la kam ba u dei uba mihkhmat na ka SBI bad u la pynngeit ïa ka ban sam ïa ka OTP, da kaba ong ruh ba kadei ka jingthmu ban pynshisha bad kane ka longkmie ka la jubab. Hadien kane ka la ïohpdiang shibun ki khubor ba la shah sei pisa kaba la kot haduh T. 93,000/- napoh ka credit card. Shi taïew hadien pat kane kaba ujor ka la ïohpdiang ïa ka SMS alert na ka bynta ban siew ïa ka EMI.
U Sha Alom Mondal u la phah ka jingujor ba ha ka mied jong ka 20 tarik mynta u bnai, ki runar bym lah ban ithuh ki la prong hapoh ka dukan jong u kaba ha ïew Chokpot (SGH) bad ki la tuh ïa ki mobile phone bad kiwei ki tiar ba la shongdor baroh kumba T. 56,51,161/-.
