Ha kane ka juk ïa beh ïa ka jingnang jingstad kaba ïaid ryngkat ryngkat bad ka jingïa beh spah ka long kaba eh haduh katta katta ban pynshai sha ki paidbah ïa kata ka jingma kaba lah ban mih na ka jingkylla ka suinbneng ne ka jingkylla ki bor ka mariang. Hynrei kaba kham suk ban batai lyngkot kaban pynpei shkor artad ïa baroh ka long kaei te kaban jia lada jia ba la tyrkhong lut ki um ki wah bad la khyrwit ka jingshit kyrang ka sngi. Ka por ka dang biang bad paka palat ïa ka Jylla Meghalaya ban kyndit bynriew katba ka um kam pat poi ha ryndang lym kumta ym myntoi shuh ban kyang ne ban pyrta shla ynda la dier ka por ne ban babe haba ka por kam myntoi shuh.
Baroh baroh yn ym don satia kiban kyntait lada wan ki kam pynroi ha ki shnong ki thaw khamtam lei lei lada wan kum ki surok, ki jaka sumar, ki skul, ki college lane ki jaka ïalehkai kiba paka, hynrei kumba ju ong ka kyntien kano kano kaba wan bad ka jingmyntoi kan don ruh khyndiat ka jingduhnong. Tiak, lada ïatai halor kane ka phang la ju ïohi ruh ba don ki khep ba ki paidbah ki mih ban pyrshah lada ka sorkar ka thmu ban tei ïa ki skul ne ki jaka sumar ha ki jaka paidbah. Ym tang katta don ruh kiba mih ban pyrshah haba don ki public hearing ba ïadei bad ki karkhana. Kum ha kine ki khep don ki jingjïa kiba hap ban ïaroh ïa ki paidbah bad don pat ki jingjia kiba donkam ban ïa syllok bad ki paidbah kiba mih ban pynpaw ïa ka jingpyrshah jong ki.
Ha ka juk ba ïabeh ïa ka jingpynkylla dur ïa ki nongkyndong sha ki jaka sor, khlem pep kin don bun ki jingkylla bad kaba nyngkong eh na kine kadei ka surok, ka tei iing tei sem, ki dukan heh ne ki shopping complex, ki jaka pule, ki madan ïalehkai bad kiwei kiwei kin mih kawei hadien kawei. Ha kum kine ki jaka kumba la sakhi ha ki thain jong ka New Shillong ka shim por tang kumba katto katne snem ba kane ka jaka kan long sor. Kumta ha kum kine ki khep donkam pat kata ka jingpynwan dur kaba paka khnang ba ka pateng kaban wan hadien 50 snem ne 100 snem kin ym tim ïa kane ka pateng kaba mynta.
Kum ka nuksa, lada kane ka pateng ba mynta kam pyrkhat shuh ïa ki tyllong um, ka pynkhyllem naphang ïa ki tynrai dieng, kam don por shuh ban thung dieng thung siej ha ki jaka kiba lait tang katta ka pateng kaban wan kan shong tyrkhong. Kam myntoi ban ïa kren kam pynroi lada ym don shuh ka umbam umdih. Ka shnong ka lah ban riewspah ha ka jingdon ki iing kiba bun mala, ki surok kiba plih, ki dukan kiba heh ba heh, ki jaka pule kiba pawnam bad ki nongshong shnong kiba la nang la stad lut hynrei haba ym don ka umbam umdih ne ka tyllong um ha ka shnong ïa kaei phin sarong.
Lah ruh ban ong ba kane ka jingma ka la sdang ban pyni dak lypa naduh mynta ha kiba bun ki shnong ki la sdang ban mad ïa ka jingkyrduh um bad kine kiba la mad ki la sdang mynta ban kyndit bynriew. Ho,oid watla ka por kam pat dier phi dang lah ban ïa wer ïa ki nongshong shnong ban mih lut ban leit thung dieng hajan baroh ki jaka ba don ki tyllong um da ka thong ba ha dien san snem ne 10 snem ka um kan sa don bïang namar ha ka por slap kine ki tynrai dieng kin sa bat ïa ka um bad kan sa tuid pat sha ki tyllong um ha ki por rkhiang.
Tangba ha kajuh ka por, lada ban biang halor kane ka mat, kam dei pat ka kam kaba suk ba
phin thied um na bynta 5 – 10 snem namar khlem pep tang ka bai um kan poi beit shi pawa na kaba kamai man u bnai. Kumta shwa ba baroh kin kyang shla kum ha ri shyiap ne ïam babe ka por ka dang biang ban pynsting ïa ki kti ki kjat ban thung dieng ha ki jaka la jong ne wat ha ki jaka jongka shnong namar ha kaba khatduh dei ka shnong ka thaw hi kaba myntoi lang lada ki tyllong um ki bun.
Dang ha ki snem ba la dep u Myntri Rangbah u la pyntip ba tang na ka sorkar ka la pynlut haduh da ki phew phew klur tyngka ban thung haduh phew lak tylli ki tynrai dieng. Kumta malu mala kumba ong u Myntri Rangbah ki tynrai dieng kiba im ki la poi sha ka 73 lak tylli ka la dei kaba bun bha. Tangba lada khein pat ïa ka jingïar ka jaka, ka Meghalaya ka dang donkam kham bun shuh shuh ki tynrai dieng kiban thung ha kylleng ki distrik ka jylla. Lada jan baroh ki shnong ki lah ban thung tang 500 tynrai tylli ki dieng ha ka shisnem lada shu khein kyllum kan poi beit sha ka 35 – 40 lak tynrai ha ka shisnem, kata ruh da kaba khein kyllum lang ïa ki shnong kiba heh bad kiba rit.
Ban thung dieng kam dei satia ka kam kaba eh ïa ki nong Meghalaya namar ka jingmlien ka la hiar pateng tangba ha ka juk stad mynta donkam pat ban jied da ki tynrai dieng kiban ïahap katkum ka jinglong ka jaka, ki tynrai dieng kiba lah ban pynneh bad bat ïa ka um slap ha ka por Lyiur bad ruh ki tynrai dieng kiban pynskhem ïa ka khyndew.
