Shillong, Jymmang 22: Ka samoi ïalehkai phutbol jong ka Shillong Sports Association kan sdang naduh ka 02 tarik Jylliew da kaba sdang ïa ka U-20 Fourth Division 2025.
Mynta u snem ki don haduh 29 tylli ki klob kiba la pyndep ïa ka jingpynrung kyrteng bad la phiah ïa ki ha ki hynriew tylli ki Group kiba la bynta mar san kynhun, lait noh tang ka Group F, kaba don saw tylli ki kynhun.
Ki jingïalehkai yn aipor 80 minit haduh ba kut bad baroh kin long ha madan First Ground jong ka SSA Stadium ha Polo.
Ki ar tylli ki kynhun kiba wan hakhmat duh na kawei pa kawei ka Group kin jam sha ka wat ïakhun kaba bud, ha kaba kin don saw tylli ki Group kiba don lai tylli ki kynhun. Nangne, ki ar tylli ki kynhun kiba kynsai tam na kawei pa kawei ka Group kin ïoh rung sha ka knockout stage, nangta ka quarterfinal bud sa ka semifinal bad final hadien.
Ka jingpeit bad bishar bñiah ïa ki rta jong ki rangïalehkai kiba lah ban shim bynta ha kane ka lympung ka la dep. Ha u snem ba la dep la shah ïa kawei pa kawei ka klob ban soi katto katne ngut ki rangïalehkai kiba la palat ïa ka 20 snem ka rta hynrei kam long kumta ha kane ka samoi.
Ki saw tylli ki kynhun kiba poi sha ka semifinal kin kiew kyrdan sha ka Third Division ha u snem 2026. Ha kawei pat ka jingpynkylla, ka kynhun kaba kamai duna poiñ na kawei pa kawei ka Group yn khang ban ïashim bynta ha ka U-20 Fourth Division ha u snem ban wan.
